கோவை ஸ்ரீராம கிருஷ்ணா கலை மற்றும் அறிவியல் கல்லூரி மைதானத்தில் நடந்த டி.என்.பி.எல். கிரிக்கெட் போட்டியின் 15வது லீக் ஆட்டத்தில் கோவை கிங்ஸ் அணியும், திருச்சி வாரியர்ஸ் அணியும் மோதி கொண்டது. அப்போது டாஸ் வென்ற கோவை கிங்ஸ் அணியின் கேப்டன் ஷாருக்கான் பந்து வீச்சை தேர்வு செய்தார். இதையடுத்து திருச்சி வாரியர்ஸ் அணியின் வீரர்கள் அமித்சாத்விக், சந்தோஷ் ஷிவ் போன்றோர் தொடக்க ஆட்டக்காரர்களாக களமிறங்கினர். ஆரம்பத்தில் இருந்தே இருவரும் அதிரடியாக விளையாடினர். இதன் காரணமாக அணியின் ஸ்கோர் 4.5 ஓவரில் 44 ரன்களாக அதிகரித்தது.
அதன்பின் அமித்சாத்விக் 18 ரன்களில் ஆட்டமிழந்து வெளியேறினார். அடுத்ததாக வந்த நிதிஷ் ராஜகோபால் 1 ரன்னில் விக்கெட்டை பறி கொடுத்தார். பின் மற்றொரு தொடக்க ஆட்டக்காரர் சந்தோஷ் ஷிவ் 28 ரன்களில் வெளியேறினார். அதனை தொடர்ந்து நிரஞ்சன்(17 ரன்கள்), ஆகாஷ் சும்ரா(1 ரன்), கோகுல்மூர்த்தி(1 ரன்), கணேஷ்(0), அஜய் கிருஷ்ணா(1) போன்றோர் அடுத்தடுத்து ஆட்டமிழந்தனர். இதனிடையில் மதிவாணன் ரன் அவுட் செய்யப்பட்டார். இருப்பினும் மறு முனையில் அதிரடிகாட்டிய முரளி விஜய் அரைசதம் கடந்தார். 35 பந்துகளில் 61 ரன்கள்(3 பவுன்டரி, 5 சிக்சர்) சேகரித்த சூழ்நிலையில், அவரும் அபிஷேக் பந்து வீச்சில் ஆட்டமிழந்தார்.
இதன் காரணமாக திருச்சி வாரியர்ஸ் அணியானது 19.3 ஓவர்களில் அனைத்து விக்கெட்டுகளையும் இழந்து 135 ரன்கள் மட்டுமே எடுத்தது. பின் 136 ரன்கள் எடுத்தால் வெற்றி எனும் இலக்குடன் கோவை கிங்ஸ் அணி விளையாடியது. தொடக்க வீரர்களாக களம்கண்ட கங்கா ஸ்ரீதர், சுரேஷ் குமார் ஜோடி எதிர் அணியின் பந்து வீச்சை சிதறடித்தனர். அந்த ஜோடி முதல் விக்கெட்டிற்கு 42 ரன்கள் எடுத்த சூழ்நிலையில் பிரிந்தது. அதன்பிறகு சுரேஷ்குமார் (15 ரன்கள்) விக்கெட் கீப்பரிடம் கேட்ச் கொடுத்து வெளியேறினார். பின் கங்கா ஸ்ரீதர் 27 ரன்கள் எடுத்து ஆட்டமிழந்தார்.
அடுத்துவந்த ஷிஜித் சந்திரன்(17 ரன்கள்), முகிலேஷ்(6 ரன்கள்) தாக்குப் பிடிக்கவில்லை. நிதானமாக விளையாடிய சாய் சுதர்ஷன் 27 ரன்கள் எடுத்து பெவிலியன் திரும்பினார். மறு முனையில் பொறுப்புடன் விளையாடிய கேப்டன் ஷாருக்கான் வெற்றிக்கு வித்திட்டார். இதன் வாயிலாக 17 ஓவர்களில் 5 விக்கெட்டுகளை இழந்து 138 ரன்கள் எடுத்து கோவை கிங்ஸ் அணியானது வெற்றி பெற்றது. இது அந்த அணியின் 2வது வெற்றி ஆகும். இதற்கிடையில் ஷாருக்கான்(24 ரன்கள்), அபிஷேக் தன்வர்(1 ரன்) ஆட்டமிழக்காமல் இருந்தனர்.