விமல் நடித்து வரும் சோழ நாட்டான் படத்தின் முதல் பாடல் விரைவில் வெளியாகவுள்ளதாக படக்குழு தெரிவித்துள்ளது.
நடிகர் விமல் வரலாற்று கதைக்களத்தில் நடித்துவரும் படம் சோழ நாட்டான். முழுக்க முழுக்க ஆக்ஷன் த்ரில்லராக உருவாகும் இப்படத்தை ரஞ்சித் கண்ணா இயக்குகிறார். வரலாற்றை அடிப்படையாக கொண்ட கதையில் விமல் நடிக்கும் முதல் படம் ‘சோழ நாட்டான்’ ஆகும்.
இந்நிலையில் அடுத்தகட்ட படப்பிடிப்பிற்காக படக்குழு சத்தியமங்கலம், மலைப்பகுதிக்கு செல்லவுள்ளனர். இதையடுத்து தஞ்சாவூர், ஹைதராபாத், வைசாக் போன்ற இடங்களில் படப்பிடிப்பு நடத்த முடிவுசெய்துள்ளனர்.
பொதுவாக ஒரு படத்தின் படப்பிடிப்பு பணிகள் முடிவடைந்த பிறகுதான் அப்படத்தின் பாடல்களை வெளியிடுவார்கள். ஆனால், தற்போது தஞ்சாவூரில் குடமுழுக்கு நடைபெறவுள்ளது. இப்படம் சோழநாட்டை மையப்படுத்தி உருவாகி வருவதால், படப்பிடிப்பு பணிகளின் இடையே குடமுழுக்கை முன்னிட்டு சோழநாட்டை பெருமைப்படுத்தும் விதமாக பிப்ரவரி மாதத்திலேயே முதல் பாடலை படக்குழு வெளியிட முடிவு செய்துள்ளது. இதற்கான அதிகாரப்பூர்வ அறிவிப்பு விரைவில் வெளியாகும் என்று படக்குழு தெரிவித்துள்ளது.