நடிகர் சிவகார்த்திகேயன் நடிப்பில் உருவாகியுள்ள “ப்ரின்ஸ்” திரைப்படம் அக்டோபர் 21-ஆம் தேதி திரையரங்குகளில் வெளியாகவுள்ளது.
இயக்குனர் அனுதீப் இயக்கத்தில் நடிகர் சிவகார்த்திகேயன் நடிக்கும் “ப்ரின்ஸ்” திரைப்படம் தமிழ் மற்றும் தெலுங்கு என 2 மொழிகளில் உருவாகியுள்ளது. இந்த திரைப்படத்தில் சிவகார்த்திகேயனுக்கு ஜோடியாக உக்ரைன் நாட்டைச் சேர்ந்த மரியா ரியாபோஷப்கா நடித்துள்ளார்.
மேலும் இந்த திரைபபடத்தில் சத்யராஜ், பிரேம்ஜி அமரன் உள்ளிட்ட பலர் நடித்துள்ளனர். தமன் இசையமைக்கும் இந்த திரைப்படத்திற்கு மனோஜ் பரமஹம்சா ஒளிப்பதிவு செய்துள்ளார்.
இதனைத் தொடர்ந்து தமன் இசையமைத்திருக்கும் இத்திரைப்படத்தின் ரசிகர்களுக்கு தீபாவளி விருந்தாக அக்டோபர் மாதம் 21-ஆம் தேதி திரையரங்குகளில் வெளியாகவுள்ளது. இந்நிலையில் “ப்ரின்ஸ்” திரைப்படத்தின் பத்திரிக்கையாளர்கள் சந்திப்பு சென்னையில் நடைபெற்றது. அதில் திரைபிரபலங்கள், படக்குழு என பலரும் கலந்துக் கொண்டனர்.
இது குறித்து சிவகார்த்திகேயன் கூறியதாவது, “ப்ரின்ஸ்” திரைப்படத்தை பொருத்தவரை இது ஒரு எளிமையான கதையாகும். இந்திய பையன் ஒருவன் ப்ரிட்டிஷ் பெண்ணை காதலிக்கிறான் என்ற ஒரு வரிதான். இதில் அனுதீப் கொடுத்திருக்கும் காமெடி விஷயங்கள் தான் இந்த திரைப்படத்தை பொருத்தவரை நாங்கள் புதிய விஷயமாக பார்க்கிறோம். காமெடி கவுண்ட்டர்கள் என்றில்லாமல், நாம் பேசும் போது சம்பந்தமே இல்லாத வேறொரு பதில் சொல்வது என கதை நகரும்.
நாங்கள் இந்த திரைப்படத்தில் காட்டியுள்ள ஊர் தமிழ்நாட்டில் எங்குமே கிடையாது. அனுதீப் உருவாக்கிய ஊர் அது. அந்த மக்கள் அனைவரும் அவர்கள் சிந்திப்பதுதான் சரி என்று யோசிப்பார்கள். அப்படியான ஊரில் இருக்கக்கூடிய ஒருவனுக்கு வரும் லக் மற்றும் பிரச்சனைகள் அதை அவன் எதிர்கொள்ளும் விதம் இவைதான் படமாக உருவாக்கப்பட்டது. இந்த திரைப்படத்தில் மூன்று பாடல்கள் உள்ளன. எல்லாருக்கும் பிடிக்கும்படியான ஜாலியான படம் இது. தீபாவளிக்கு குடும்பங்களாக பார்க்கும்படியான எண்டர்டெயின்மெண்ட்டான படம். இன்னொரு பக்கம் கார்த்தி நடிக்கும் “சர்தார்” திரைப்படம் வெளியாகிறது.
இதனை அடுத்து இரண்டு படங்களும் முற்றிலும் வேறான கதைக்களம். இரண்டு படங்களுக்கும் வெற்றிக்கு வாழ்த்துகள். மேலும் அனுதீப் தெலுங்கில் தான் யோசிப்பார். இதை தமிழ்-தெலுங்கு என இரண்டு மொழிகளுக்கு ஏற்ற மாதிரி கொண்டு போய் சேர்ப்பதுதான் எங்கள் முன் இருந்த சவால். தீபாவளிக்கு மூன்று நாட்கள் முன்னால் அக்டோபர் மாதம் 21-ஆம் தேதி அன்று படம் வெளியாகிறது. தீபாவளி அன்று வெளியாகும் என்னுடைய முதல் படம் இது. இதற்கு முன்னால் சின்ன வயதில் இருந்து 20 வருடங்களாக தீபாவளி அன்று வெளியாகும் அனைத்து ஹீரோக்களின் படங்களையும் பார்த்திருக்கிறேன். இப்போது என்னுடைய படத்தைப் பார்க்க போகிறேன் என்பது மகிழ்ச்சி” என்று அவர் கூறியுள்ளார்.