ஜிவி பிரகாஷின் படத்தினை தடை செய்ய வேண்டும் என உயர் நீதிமன்றத்தில் வழக்கு தொடரப்பட்டுள்ளது.
கிரிக்கஸ் சினி கிரியேஷன்ஸ் சார்பில் ஸ்ரீதரன் மரியதாசன் தயாரிப்பில், வசந்தபாலன் இயக்கத்தில், பிரபல நடிகர் ஜிவி பிரகாஷ் நடிப்பில் உருவாகியுள்ள திரைப்படம் ஜெயில். இந்தப் படத்தில் ஜிவிக்கு ஜோடியாக அபர்ணதி நடித்துள்ளார். மேலும் இப்படத்தில் நந்தன் ராம், பசங்க பாண்டி, ராதிகா உள்ளிட்ட மேலும் பலர் நடித்துள்ளனர்.
ஜெயில் திரைப்படம் வரும் டிசம்பர் மாதம் 9ஆம் தேதி ரிலீஸாகும் என்று அறிவிக்கப்பட்டிருந்த நிலையில் பிரபல ஸ்டூடியோ க்ரீன் நிறுவனம் சென்னை ஹைகோர்ட்டில் ஜெயில் திரைப்படம் ரிலீஸ் செய்ய தடை விதிக்க வேண்டும் என வழக்கு தொடர்ந்துள்ளது.
ஏனென்றால் ஜெயில் படத்தின் விநியோக உரிமையை படத்தயாரிப்பாளர் முதலில் ஸ்டூடியோ க்ரீன் நிறுவனத்திற்கு விற்பனை செய்திருந்ததாகவும் தற்போது வேறொரு நிறுவனத்திற்கு விநியோக உரிமையை கொடுத்திருப்பதால் வழக்கு தொடரப்பட்டுள்ளது. ஆகையால் சென்னை உயர்நீதிமன்றம் ஜெயில் படத்தின் தயாரிப்பு நிறுவனத்திற்கு இது குறித்து பதில் அளிக்குமாறு உத்தரவிட்டுள்ளது.