உலகிலேயே ஒரே நாளில் அதிக அளவு கொரோனா தொற்று பாதிப்பு கொண்ட நாடாக இந்தியா உருவெடுத்துள்ளது.
உலக அளவில் இதுவரை இரண்டரை கோடி மக்கள் தொற்றால் பாதிக்கப்பட்ட நிலையில், 8 லட்சத்து 43 ஆயிரம் பேர் உயிரிழந்துள்ளனர். உலகிலேயே கொரோனாவால் அதிக பாதிப்பு அடைந்த நாடாக அமெரிக்கா உள்ளது. அங்கு கிட்டத்தட்ட 60 லட்சம் பேர் பாதிப்புக்குள்ளாகி உள்ளனர். இதனிடையில் நேற்று இந்தியாவில் 78 ஆயிரத்து 761 பேர் கொரோனாவால் பாதிக்கப்பட்டனர்.
இதன் மூலம் உலகிலேயே ஒரே நாளில் கொரோனா அதிக அளவு பாதித்த நாடாக இந்தியா உருவெடுத்துள்ளது. இதற்கு முன்னர் கடந்த ஜூலை 17ம் தேதி அமெரிக்காவில் 77 ஆயிரத்து 299 பேர் பாதிக்கப்பட்டு அதிக அளவாக இருந்து வந்த நிலையில் அதனை இந்தியா முறியடித்துள்ளது. பொருளாதாரத்தை உயர்த்துவதற்காக மத்திய அரசு விளக்கு அளித்து வருவதே கொரோனா தொற்று உயர்ந்து வருவதற்கு காரணம் என வல்லுநர்கள் தெரிவிக்கின்றனர்.