இந்தியன் -2 படப்பிடிப்பு தளத்தில் ஏற்பட்ட விபத்து தொடர்பாக நடிகர் கமல் , இயக்குனர் ஷங்கருக்கு சம்மன் அனுப்ப போலீசார் முடிவு செய்துள்ளனர்.
நடிகர் கமல் நடிப்பில் இயக்குனர் ஷங்கர் இணைந்துள்ள இந்தியன் 2 படத்தின் படப்பிடிப்பின் ஷூட்டிங் சென்னை பூந்தமல்லி அடுத்த நசரத்பேட்டையில் உள்ள இவிபி பிலிம் சிட்டியில் பிரம்மாண்ட செட் அமைக்கப்பட்டு கடந்த சில தினங்களாக நடைபெற்று வந்தது. இதில் செட் அமைக்கும் பணியின் போது எதிர்பாராத விதமாக, ஸ்டுடியோ லைட் வைக்கப்பட்டிருந்த ராட்சத கிரேன் அறுந்து விழுந்த விபத்தில் சிக்கி உதவி இயக்குனர் கிருஷ்ணா, மது மற்றும் சந்திரன் என 3 பேர் சம்பவ இடத்திலேயே பரிதாபமாக உயிரிழந்தனர்.
மேலும் 10 பேர் படுகாயமடைந்த நிலையில் மருத்துவமனையில் அனுமதிக்கப்பட்டு சிகிச்சை பெற்று வருகின்றனர். இந்நிலையில் இணை இயக்குனர் குமார் நசரத்பேட்டை காவல்நிலையத்தில் லைக்கா நிறுவனம் போதிய பாதுகாப்பு ஏற்பாடு செய்யவில்லை , கிரேன் ஆப்ரேட்டர் அஜாக்கிரதையாக இருந்தார் என்று புகார் கொடுத்ததன் அடிப்படையில் அஜாக்கிரதையாக இருந்து மரணத்தை விளைவித்தல், காயம் ஏற்படுத்துதல், இயந்திரத்தை தவறாக பயன்படுத்துதல் என 4 பிரிவுகளின் கீழ் கிரேன் ஆபரேட்டர் ராஜன் , லைகா நிறுவனம் உரிமையாளர் , புரொடக்ஷன் மேனேஜர் ஆகியோர் மீது 4 பிரிவுகளின் கீழ் வழக்கு பதிவு செய்யப்பட்டிருக்கிறது.
இந்நிலையில் இந்த வழக்கு குறித்து விரிவான விசாரணை நடத்த போலீசார் முடிவு செய்துள்ளனர். சம்பவ இடத்தில் யார் யார் இருந்தார்கள் என்ற பட்டியலை தயாரித்துள்ள போலீசார் நடிகர் கமல், இயக்குனர் சங்கர் ஆகியோருக்கு சம்மன் அனுப்பி விசாரிக்க முடிவு செய்து சம்மன் அனுப்ப திட்டமிட்டுள்ளனர். மேலும் காயமடைந்து மருத்துவமனையில் சிகிச்சை பெற்று வரும் 10 பேருக்கும் சம்மன் அனுப்பி விசாரணை மேற்கொள்ள இருப்பதாக போலீசார் தெரிவித்துள்ளனர்.