தமிழகத்தில் கடந்த ஆண்டு மார்ச் மாதம் கொரோனா அச்சுறுத்தல் காரணமாக ஊரடங்கு அமல்படுத்தப்பட்டது. அப்போது பலத்த கட்டுப்பாடுகள் விதிக்கப்பட்டன. அதன்பிறகு கொரோனா பாதிப்பு சற்று குறைந்த நிலையில்,ஊரடங்கு தளர்வுகளை தமிழக அரசு படிப்படியாக அறிவித்து வந்தது. அதன்படி பல்வேறு தளர்வுகள் அறிவிக்கப்பட்டன. ஆனால் கடந்த ஒரு மாதமாக தமிழகத்தில் கொரோனா பாதிப்பு புதிய உச்சத்தை தொட்டுள்ளது.
அதனால் மீண்டும் ஊரடங்கு கட்டுப்பாடுகள் விதிக்கப் படும் சூழல் உருவாகியது. இதனையடுத்து தமிழகம் முழுவதிலும் இரவு 10 மணி முதல் அதிகாலை 4 மணி வரை இரவு நேர ஊரடங்கு அமல்படுத்தப்பட்டு உள்ளது. அது மட்டுமன்றி பல கட்டுப்பாடுகளும் விதிக்கப்பட்டுள்ளன. இவை அனைத்தும் கடந்த ஏப்ரல் 20ஆம் தேதி அமலுக்கு வந்தது. மேலும் தமிழகத்தில் கொரோனா பரவலை கட்டுப்படுத்த நேற்று முதல் பல கட்டுப் பாடுகளுடன் கூடிய ஊரடங்கு அமலுக்கு வந்துள்ளது.
இந்நிலையில் சென்னையில் 5 பேருக்கு கொரோனா பரிசோதனை செய்தால் ஒருவருக்கு கொரோனா பாதிப்பு இருப்பதாக அதிர்ச்சித் தகவலை மாநகராட்சி வெளியிட்டுள்ளது. அடுத்த 30 முதல் 35 நாட்கள் சென்னைக்கு மிகவும் கஷ்டமான நாட்கள். மருத்துவ நிபுணர்கள் கருத்துப்படி கொரோனா உச்சத்தை எட்டும். குழந்தைகள் மற்றும் முதியோர்கள் உள்ளிட்டோர் பாதுகாப்பாக வீட்டில் இருக்க வேண்டும் என அறிவுறுத்தியுள்ளது.