அஸ்வின் சரவணன் இயக்கத்தில் நயன்தாரா நடித்திருக்கும் “கனெக்ட்” திரைப்படம் கிறிஸ்துமஸ் பண்டிகையை முன்னிட்டு ரிலீஸ் ஆகும் என அறிவித்து உள்ளனர். இந்த படத்தில் சத்யராஜ், வினய் போன்றோர் முக்கியமான கதாபாத்திரங்களில் நடித்து இருக்கின்றனர். இது பேய் திரைப்படமாக தயாராகியுள்ளது. கொரோனா ஊரடங்கில் நயன்தாரா தன் மகளுடன் வீட்டில் இருக்கும் போது அமானுஷ்யங்களில் சிக்கிக்கொள்வதும், அதிலிருந்து எப்படி தப்புகின்றனர் என்பதும் தான் கதை. இப்படம் மொத்தம் 99 நிமிடங்கள் ஓடக்கூடிய அடிப்படையில் உருவாக்கப்பட்டுள்ளது.
மேலும் படத்துக்கு இடைவேளை இல்லை என படக்குழுவினர் தெரிவித்து இருந்தனர். இந்நிலையில் கனெக்ட் திரைப்படத்தை இடைவேளை இன்றி திரையிட தியேட்டர் அதிபர்கள் மறுத்துவிட்டனர். இது தொடர்பாக தமிழ்நாடு திரையரங்கு உரிமையாளர்கள் சங்க நிர்வாகி ஸ்ரீதர் கூறியதாவது, ”கனெக்ட் படத்திற்கு இடைவேளை இல்லை என அவர்களாகவே அறிவித்துள்ளனர். தியேட்டர் அதிபர்களுக்கு இதுவரையிலும் அதுபற்றி தெரிவிக்கவில்லை. இடைவேளை இன்றி எங்களால் படத்தை திரையிட முடியாது” என்று கூறினார்.