தமிழகத்தில் பள்ளிக்கல்வியில் கூடுதலாக 254 முதுநிலை பட்டதாரி ஆசிரியர் பணியிடங்களுக்கு பள்ளிக்கல்வித்துறை அனுமதி அளித்துள்ளது. அதாவது தமிழகத்தில் அரசு பள்ளிகளில் கடந்த கல்வி ஆண்டில் மாணவர்கள் எண்ணிக்கையின் அடிப்படையில் பணியாளர் நியமனம் செய்ததில் உபரியாக கண்டறியப்பட்ட முதுநிலை ஆசிரியர் பணியிடங்கள் பொதுத் தொகுப்புக்கு பள்ளிக் கல்வித் துறையிடம் ஒப்படைக்கப்பட்டது. இதனைத் தொடர்ந்து பிளஸ் ஒன் மற்றும் பிளஸ் டூ மாணவர்கள் எண்ணிக்கைக்கு ஏற்றவாறு கூடுதல் ஆசிரியர் பணியிடங்கள் கோரி கருத்துக்கள் பெறப்பட்டன.
இந்நிலையில் 254 முதுநிலை ஆசிரியர் பணியிடங்களை மீண்டும் தேவை உள்ள பள்ளிகளுக்கு வழங்க பள்ளி கல்வித்துறை முடிவு செய்துள்ளது. அதன்படி நடப்பு கல்வி ஆண்டில் தமிழ், ஆங்கிலம், கணிதம், இயற்பியல், வேதியல், வரலாறு,வணிகவியல் மற்றும் பொருளாதாரம் ஆகிய பாடப்பிரிவுகளில் கூடுதலாக 254 முதுநிலை பட்டதாரி ஆசிரியர் பணியிடங்களுக்கு அனுமதி அளித்து பள்ளிக் கல்வித் துறை உத்தரவிட்டுள்ளது.