கன்னட திரையுலகில் பழமையான நடிகர்களில் ஒருவர் லோகிதஷ்வா (80). துமகூரு மாவட்டத்தை சேர்ந்த இவர் பெங்களூரு குமாரசாமி லே அவுட் பகுதியில் தன் குடும்பத்துடன் வசித்துவந்தார். இவர் 500க்கும் அதிகமான படங்களில் நடித்திருந்தார். அத்துடன் இவர் தன் ஏராளமான திரைப்படங்களில் முதல்-மந்திரி கதாபாத்திரத்தில் நடித்திருந்தார்.
மறைந்த நடிகர் டாக்டர் ராஜ்குமார் உட்பட பல பேருடன் சேர்ந்து நடித்திருந்தார். இதனிடையில் வயது முதிர்வு காரணமாக லோகிதஷ்வாவுக்கு உடல்நலக்குறைவு ஏற்பட்டது. இதற்காக அவர் பல மருத்துவமனைகளில் அனுமதிக்கப்பட்டு சிகிச்சை பெற்று வந்தார். சென்ற மாதம் பெங்களூருவிலுள்ள தனியார் மருத்துவமனையில் அவர் தீவிர சிகிச்சை பிரிவில் சேர்க்கப்பட்டார்.
அங்கு மருத்துவர்கள் அவருக்கு சிகிச்சையளித்து வந்தனர். இந்நிலையில் லோகிதஷ்வா நேற்று சிகிச்சை பலனின்றி பரிதாபமாக இறந்தார். அவரது இறப்புக்கு முதல்-மந்திரி பசவராஜ் பொம்மை, முன்னாள் முதல்-மந்திரி குமாரசாமி உட்பட தலைவர்கள் இரங்கல் தெரிவித்து வருகின்றனர். இவரது இறுதிசடங்குகள் சொந்த ஊரான துமகூரு மாவட்டம் தொண்டகெலே கிராமத்தில் இன்று நடைபெறவுள்ளது.