தமிழில் ரோஜா திரைப்படத்தின் வாயிலாக நாயகனாக அறிமுகமானவர் அரவிந்த்சாமி. இதனையடுத்து பம்பாய், மின்சார கனவு ஆகிய திரைப் படங்களில் நடித்து பிரபலமான இவர், சில ஆண்டுகளாக நடிப்பதை தவிர்த்து வந்தார். அதன்பின் மணிரத்தினத்தின் “கடல்” படம் வாயிலாக ரீ என்ட்ரி கொடுத்த அரவிந்த்சாமி, தனி ஒருவன் திரைப்படத்தில் வில்லனாக நடித்து கவனம் பெற்றார். இந்நிலையில் அரவிந்த்சாமி குஞ்சாக்கோ போபனுடன் இணைந்து நடித்திருக்கும் படம் “ரெண்டகம்”.
மலையாள நடிகர் குஞ்சாக்கோ போபன் ரெண்டகம் திரைப்படத்தின் வாயிலாக தமிழில் அறிமுகமாகிறார். இத்திரைப்படம் தமிழ் மற்றும் மலையாளம் என இரண்டு மொழிப்படமாக வெளியாக உள்ளது. இந்த படம் மலையாளத்தில் “ஒட்டு” எனும் பெயரில் வெளியாகிறது. இப்படத்தில் அரவிந்த்சாமி, ஈஷா ரெப்பா, ஜாக்கி ஷெராப் போன்றோர் முக்கியமான வேடங்களில் நடித்து இருக்கின்றனர். பெலினி டிபி இயக்கியுள்ள இப்படத்தை நடிகர் ஆர்யாவின் தயாரிப்பு நிறுவனமான திஷோ பீப்பிள் நிறுவனம் தயாரித்துள்ளது.
அண்மையில் இந்த படத்தின் டிரைலர் வெளியாகி ரசிகர்களின் கவனத்தைப் பெற்றது. முன்பாக செப்டம்பர் 2ம் தேதி வெளியாகும் என அறிவிக்கப்பட்ட இப்படம், சென்சார் பணி காரணமாக ஒத்திவைக்கப்பட்டது குறிப்பிடத்தக்கது. இந்த நிலையில் இத்திரைப்படத்தின் புதிய ரிலீஸ் தேதியை படக்குழு அறிவித்துள்ளது. அந்த வகையில் “ரெண்டகம்” படம் வரும் செப்டம்பர் 23 ஆம் தேதி வெளியாகும் என்று அறிவிக்கப்பட்டுள்ளது.