விழுப்புரம் மாவட்டம் கண்டாச்சிபுரம் வட்டம் மனம் பூண்டி புதுநகர் பகுதியில் புதிய பகுதிநேர நியாய விலை கடையை திறக்கும் நிகழ்ச்சி நடைபெற்றுள்ளது. இந்த நிகழ்ச்சியில் திமுக துணை பொது செயலாளர் உயர்கல்வித்துறை அமைச்சர் பொன்முடி கலந்து கொண்டு பேசியுள்ளார். அப்போது அவர் பேசியதாவது, தமிழ்நாடு முதல்வர் மு க ஸ்டாலின் அவர்கள் ஆட்சிப் பொறுப்பேற்ற உடன் ஏழை எளிய மக்கள் பயன்பெறும் விதமாக நியாய விலை கடைகள் மூலம் வழங்கப்படும் உணவு பொருட்களை மாதம்தோறும் சரியான நேரத்தில் சரியான நிலையில் தரமாக வழங்கிட நடவடிக்கை எடுக்கப்பட்டிருக்கிறது. அதிலும் குறிப்பாக நியாய விலை கடைகள் மூலமாக வழங்கப்படும் பொருட்கள் குடும்ப அட்டைதாரர்களுக்கு தரமாக வழங்குவதே உறுதி செய்திடும் விதமாக அவர்களும் அமைச்சர் பெருமக்கள் மாவட்ட ஆட்சியர் நாடாளுமன்ற உறுப்பினர் சட்டமன்ற உறுப்பினர்கள் உள்ளாட்சி அமைப்பு பிரதிநிதிகள் போன்று ஆய்வு செய்திட வேண்டும் என அறிவுறுத்தியுள்ளதன் அடிப்படையில் தற்போது அனைத்து நியாயவிலை கடைகளிலும் பொருட்கள் சரியான நேரத்தில் தரமான உணவுப் பொருட்கள் வழங்கப்படுகிறது என தெரிவித்துள்ளார்.
இதனை தொடர்ந்து பேசிய அமைச்சர் பொன்முடி இட ஒதுக்கீடு தாழ்த்தப்பட்ட மக்களுக்காக திமுக செய்த திட்டங்கள் மற்றும் பெண்கள் வளர்ச்சிக்காக முதல்வர் ஸ்டாலின் செய்த வளர்ச்சி திட்டங்கள் பற்றி எடுத்துரைத்துள்ளார். அப்போது எடுத்துக்காட்டிற்காக மேடையில் இருந்த முகையூர் ஒன்றிய குழு தலைவரை அறிமுகப்படுத்தி பேசும் போது நீங்கள் எஸ் சி தானே என கேள்வி எழுப்பியுள்ளார். அதற்கு ஒன்றிய குழு தலைவர் எழுந்து நின்று ஆமாம் சார் என கூறிவிட்டு அமர்ந்துள்ளார். அதன் பின் மேடையில் பெண்கள் அமர்வதற்கு உரிமை பெற்றுக் கொடுத்ததே திமுக தான் எனவும் உள்ளாட்சி அமைப்புகளில் 50% விழுக்காடு பெண்களுக்கு இட ஒதுக்கீடு அளித்த உன்னத மனிதன் முதல்வர் ஸ்டாலின் எனவும் புகழாரம் சூட்டியுள்ளார். இந்த சூழலில் அமைச்சர் பேசிய வீடியோவை சிலர் எடிட்டிங் செய்து சமூக வலைதளங்களில் பதிவிட்டு வருகின்றார்கள். அதில் திமுக அமைச்சர் தாழ்த்தப்பட்டவர்களை அவதூறாக பேசியதாகவும் அவர்கள் கருத்து தெரிவித்து வருகின்றார்கள். மேலும் அமைச்சர் பொன்முடி பெண்கள் சம உரிமை பற்றி பேசும்போது உதாரணத்திற்காக கூறிய விஷயத்தை எதிர்க்கட்சியினர் பெரிதாக்கி வருகின்றார்கள் என திமுகவினர் பதில் அளித்து இருக்கின்றனர்.