இயற்கை பேரழிவு, வானிலை, உள்நாட்டுப்போர், கலவரம், விமானச்சேவையை முடக்கும் படி அரசு பிறக்கும் உத்தரவு, வேலை நிறுத்தங்கள், தொழிலாளர் போராட்டம், அரசியல் ஸ்திரமின்மை போன்ற காரணங்களால் விமானச்சேவைகளில் தாமதம் மற்றும் ரத்து போன்ற நிகழ்வுகள் ஏற்படுகிறது. இதன் காரணமாக விமான நிறுவனங்கள் நஷ்டத்தைச் சந்தித்தாலும் தவிர்க்க முடியாத காரணங்களுக்காக அவசரமாகப் பயணம் மேற்கொள்ளத் திட்டமிட்டுள்ள பயணிகள் கடும் சிரமத்திற்கு ஆளாகின்றனர். இந்நிலையில் விமானங்கள் திடீரென்று ரத்து செய்யப்படுவது, தாமதமாவது ஆகியவற்றால் பயணிகள் எதிர்கொள்ளும் சிரமத்தைத் தவிர்க்க ஏர்இந்தியா நிறுவனம் புது தொழில்நுட்பத்தைப் பயன்படுத்தத் திட்டமிட்டு உள்ளது.
ஏர் இந்தியா நிறுவனத்தை வாங்கியதில் இருந்தே டாடா குழுமம் அதை மேம்படுத்த பல நடவடிக்கைகளை மேற்கொண்டு வருகிறது. பயணிகளின் கவனத்தை ஈர்க்கும் அடிப்படையில் பயணச் சேவையில் புதுப்புது விஷயங்களை அறிமுகப்படுத்த முயன்றுவருகிறது. அதிலும் குறிப்பாகப் பயணிகள் பயண விபரங்கள் பற்றி அறிய பிளாக் டைமிங், விமான நிலையங்களை இணைக்கும் நேரம், விமானம் மற்றும் பணியாளர்களின் ஷிப்ட் போன்றவற்றை ஆய்வு செய்துள்ளது. ஏர் இந்தியாவின் தலைமை நிர்வாக அதிகாரி மற்றும் நிர்வாக இயக்குநரான கேம்ப்பெல் வில்சன் வெள்ளிக்கிழமை வெளியிட்டுள்ள அறிவிப்பில், மேம்படுத்தப்பட்ட சேவையை வழங்கக் கூடுதல் விமானங்களைக் கவர்செய்யத் திட்டமிட்டுள்ளதாக அறிவித்து இருந்தார்.
பயணிகள் விரும்பக்கூடிய அனைத்து ஸ்மார்ட்விஷயங்களையும் சீசன் வாரியாக அரங்கேற்ற இருப்பதாகவும், விமான நிலையம் சார்ந்த சிக்கல்களை அறிந்துகொள்ள விமான நிலையம்,, மையக் கட்டுப்பாடு, பிராந்திய கட்டுப்பாட்டு ஒருங்கிணைப்புக் குழுவையும் அமைக்கத் திட்டமிடப்பட்டுள்ளதாகவும் தெரிவித்துள்ளார். அத்துடன் விமானச்சேவையில் ஏற்படும் தாமதங்கள், அட்டவணை மாற்றங்கள், ரத்து ஆகிய தகவல்களை முன் கூட்டியே விமான பயணிகளுக்குத் தெரிவிப்பதற்கான புது தொழில்நுட்பத்தை உருவாக்கி வருகிறோம். இதன் வாயிலாக வாடிக்கையாளர்கள் தாங்கள் பயணிக்க விரும்பும் இடத்திற்கான விமானச்சேவையை சுயமாக மாற்றிக் கொள்ள முடியும்.
இதுவரையிலும் வாடிக்கையாளர்களுக்கு முன்கூட்டியே விமானச்சேவை பற்றி அறிவிக்கக்கூடிய 7 காரணங்களைப் பட்டியலிட்டு இருப்பதாகவும், இன்னும் 2 மாதங்களுக்கு அனைத்தையும் பட்டியலிட ஏர் இந்தியாவின் தகவல் தொழில்நுட்பம் மற்றும் வாடிக்கையாளர் சேவை குழுக்கள் பணிபுரிந்து வருகின்றனர் எனவும் தெரிவித்துள்ளார். சென்ற ஜனவரி மாதம் மத்திய அரசிடம் இருந்து ஏர் இந்தியா நிறுவனத்தை டாடா குழுமம் ஏலம் வாயிலாக கைப்பற்றியது. தங்களது முயற்சிக்கு நல்ல வரவேற்பு கிடைத்து வருவதையடுத்துக் கடந்த மாதம் கூட 24 உள்நாட்டு விமானங்களை இயக்க முடிவுசெய்யப்பட்டது. இப்போது ஏர்இந்தியா நிறுவனத்திடம் 70 விமானங்கள் உள்ள நிலையில், அதில் 54 விமானங்கள் சேவை வழங்கி வருகிறது. மீதம் உள்ள 16 விமானங்கள் 2023ம் வருடம் முதல் படிப்படியாகச் சேவையை ஆரம்பிக்கும் எனவும் கூறப்படுகிறது.