தென் கொரியாவை பந்தாடிய ‘ஹின்னம்னோர்’ புயலால் 2 பேர் உயிரிழந்துள்ளனர்.
தென்கொரியா நாட்டை ‘ஹின்னம்னோர்’ புயல் நேற்று முன்தினம் பலமாக தாக்கியது. இந்த புயல் அதிகாலை 4.50 மணிக்கு உல்சான் நகரம் அருகே கரையை கடந்துள்ளது. இதன் காரணமாக அந்நாட்டின் தென் பகுதிகளில் மணிக்கு 140 கி.மீ. வேகத்தில் சூறாவளி காற்று வீசியது. 3 அடி அளவுக்கு பலத்த மழை பெய்தது. இது போன்று பல இடங்களில் சாலைகளில் வெள்ளம் பெருக்கெடுத்து ஓடியது. ஆங்காங்கே நிலச்சரிவுகள் ஏற்பட்டுள்ளன. நூற்றுக்கணக்கான மரங்கள் வேரோடு சாய்ந்து சாலைகள் சேதமடைந்தன. இதனால் போக்குவரத்து பாதித்தது. அங்கு 66 ஆயிரத்துக்கும் மேற்பட்ட வீடுகள் இருளில் மூழ்கியுள்ளன. மேலும் பல வீடுகள் இடிந்து காணப்படுகின்றன. புயல், மழை வெள்ளம் தொடர்பான சம்பவங்களில் பெண்கள் 2 பேர் உயிரிழந்துள்ளனர். 10 பேர் காணாமல் போயின அவர்களை தேடும் பணி தீவிரமாக நடந்து வருகின்றது.
இதுபோன்று போகாங் நகரில் பெரிய உருக்காலை ஒன்றில் தீவிபத்துகள் ஏற்பட்டுள்ளதாக தகவல்கள் வெளியாகியுள்ளன. ஆனால் இவை புயலால் நேரிட்டவையா என்பது குறித்து தகவல் இல்லை. ‘ஹின்னம்னோர்’ புயல் மற்றும் வெள்ளம், நிலச்சரிவால் ஏற்படக்கூடிய சேதங்கள் குறித்து மக்கள் விழிப்பாக இருக்குமாறு அரசு அதிகாரிகள் உஷார்படுத்தியுள்ளனர். ஹின்னம்னோர் புயலால் பெரிதும் சேதமடைந்துள்ள பகுதிகளிலிருந்து ஆயிரக்கணக்கானோர் அப்புறப்படுத்தப்பட்டுள்ளனர். இந்த புயல் இதுவரை நாம் அனுபவித்திராத வலுவான சூறாவளியாக முடியும் என்று அந்நாட்டின் பிரதமர் ஹான்டுக் சூ தெரிவித்துள்ளார். புயல், மழை காரணமாக 600-க்கும் மேற்பட்ட பள்ளிக்கூடங்கள் மூடப்பட்டுள்ளன. 250-க்கும் மேற்பட்ட விமான சேவைகள் முடங்கின. 66 ஆயிரம் மீன்பிடி படகுகள் துறைமுகங்களுக்கு வெளியேற்றப்பட்டுள்ளன. மேலும் மீட்பு, நிவாரண நடவடிக்கைகளை தென்கொரிய அரசு முடுக்கி விட்டுள்ளது.