பிரிட்டன் நாட்டின் பிரதமர் தேர்தலுக்குரிய கருத்துக்கணிப்பு வெளியான நிலையில் ரிஷி சுனக் பின்னடைவை சந்தித்திருப்பதாக தெரிவிக்கப்பட்டுள்ளது.
பிரிட்டன் பிரதமர் போரிஸ் ஜான்சன் சமீபத்தில் தன் பதவியை ராஜினாமா செய்தார். அதனைத் தொடர்ந்து, பிரதமரை தேர்ந்தெடுக்கும் பணி நடந்தது. பிரதமர் போட்டியில் பல கட்ட சுற்றுகளுக்கு பிறகு கடைசி வேட்பாளராக 8 நபர்களில், நிதி அமைச்சராக இருந்த இந்திய வம்சாவளியினரான ரிஷி சுனக், வெளியுறவு துறை மந்திரியாக இருக்கும் லிஸ் ட்ரஸ் ஆகிய இருவரும் தேர்ந்தெடுக்கப்பட்டார்கள்.
கன்சர்வேட்டிவ் கட்சியை சேர்ந்த 2 லட்சம் உறுப்பினர்கள், அந்த இரண்டு பேரில் ஒருவரை கட்சி தலைவர் மற்றும் பிரதமராக தேர்ந்தெடுப்பார்கள். அந்த தேர்தலானது அடுத்த மாதம் நான்காம் தேதியிலிருந்து செப்டம்பர் மாதம் முதல் வாரம் வரை நடக்கும். இந்நிலையில் கருத்து கணிப்பில் ரிஷி சுனக்கை விட லிஸ் ட்ரஸ்-ற்கு அதிக ஆதரவு இருப்பதாக தெரிவிக்கப்பட்டுள்ளது.