நீட் தேர்வுக்கான ஹால் டிக்கெட் நாளை ஜூலை 12ஆம் தேதி வெளியாகும் என்று தேசிய தேர்வு முகமை அறிவித்துள்ளது.
எம்பிபிஎஸ், பிடிஎஸ், சித்தா, ஆயுர்வேதா, யுனானி, ஹோமியோபதி படிப்புகளுக்கு மாணவர் சேர்க்கை நீட் தேர்வு மதிப்பெண் அடிப்படையில் நடைபெற்று வருகிறது. அந்த வகையில் நடப்பு கல்வி ஆண்டுக்கான மருத்துவம் சார்ந்த படிப்புகளுக்கு நீட் தேர்வு வரும் 17ஆம் தேதி நடைபெற உள்ளது. இந்த தேர்வுக்கு கடந்த மே மாதம் 20ஆம் தேதி வரை விண்ணப்பிப்பதற்கு அவகாசம் வழங்கப்பட்டிருந்தது.
அதன்படி அதன்படி, நீட் தேர்வுக்கு 10 லட்சத்து 64 ஆயிரத்து 606 பெண்கள், 8 லட்சத்து 7 ஆயிரத்து 711 ஆண்கள், 12 திருநங்கைகள் என மொத்தம் 18 லட்சத்து 72 ஆயிரத்து 339 பேர் விண்ணப்பித்து இருக்கின்றனர். தமிழகத்தில் இருந்து மட்டும் ஒரு லட்சம் விண்ணப்பங்கள் வந்துள்ளது. இந்த நிலையில் நீட் தேர்வுக்கான ஹால் டிக்கெட் இன்று வெளியிடப்படும் என அறிவிக்கப்பட்டிருந்த நிலையில், நாளை ஜூலை 12ஆம் தேதி காலை 11:30 மணிக்கு ஹால் டிக்கெட் வெளியாகும் என்று தேசிய தேர்வு முகமை அறிவித்துள்ளது. எனவே தேர்வு எழுதும் மாணவர்கள் https://neet.nta.nic.in என்ற இணையதளத்தில் ஹால் டிக்கெட் பதிவிறக்கம் செய்து கொள்ளலாம் எனவும் தெரிவிக்கப்பட்டுள்ளது.