பா.ஜ.க எம்.பி தன்னுடைய உடல் எடையை குறைத்துள்ளார்.
மத்திய சாலை போக்குவரத்து மற்றும் நெடுஞ்சாலைத்துறை அமைச்சர் நிதின் கட்காரி மத்திய பிரதேச மாநிலம் மால்வா பகுதியில் 11 சாலை திட்டங்களுக்கு அடிக்கல் நாட்டினார். இதற்காக 5,772 கோடி ரூபாய் நிதி ஒதுக்கப்பட்டது. இந்த அடிக்கல் நாட்டு விழாவின் போது உஜ்ஜயினி மக்களவை தொகுதியின் பா.ஜ.க உறுப்பினர் அமைச்சர் நிதின் கட்காரியிடம் தொகுதி வளர்ச்சிக்காக நிதி ஒதுக்கும் படி கேட்டுள்ளார். அதற்கு அமைச்சர் நிதின் கட்காரி ஒவ்வொரு கிலோ எடை குறைவுக்கும் ரூபாய் 1,000 கோடி நிதி ஒதுக்கப்படும் என நகைச்சுவையாக கூறினார்.
இதுகுறித்து அமைச்சர் கூறுகையில், அவர் தன்னுடைய தொகுதி வளர்ச்சிக்காக நிதி ஒதுக்கும் படி என்னிடம் தொடர்ந்து கேட்டுக் கொண்டே இருந்தார். இதனால் நான் அவரிடம் ஒரு நிபந்தனை விதித்துள்ளேன். நான் என்னுடைய உடல் எடையை 135 கிலோவிலிருந்து 93 கிலோவாக குறைத்து, அந்தப் புகைப்படத்தை அனில் பிரஜியோவிடம் காண்பித்துள்ளேன். அதன் பிறகு ஒவ்வொரு கிலோ எடை குறைப்பிற்கும் ரூபாய் 1,000 கோடி நிதி ஒதுக்கப்படும் என கூறினேன் என்றார்.
இதனையடுத்து பா.ஜ.க எம்.பி தன்னுடைய எடையை குறைக்கும் முயற்சியில் ஈடுபட்டார். இவர் 125 கிலோவில் இருந்து தற்போது 15 கிலோ வரை உடல் எடையை குறைத்துள்ளார். இதுகுறித்து பா.ஜ.க எம்.பி கூறுகையில் என்னுடைய உடல் ஆரோக்கியத்தை ஊக்குவிக்கும் வகையில் அமைச்சர் நிதின் கட்காரி ஒவ்வொரு கிலோ எடை குறைப்புக்கு ரூபாய் 1,000 கோடி நிதி ஒதுக்கப்படும் என கூறினார். இதனால் நான் கடந்த 4 மாதங்களில் 15 கிலோ வரை எடையை குறைத்துள்ளேன்.
இதனால் என்னுடைய தொகுதி வளர்ச்சிப் பணிக்காக ரூபாய் 15,000 கோடி வரை நிதி ஒதுக்குமாறு கேட்கும் உரிமை எனக்கு இருக்கிறது. எனவே மழைக்கால கூட்டத் தொடரின் போது நான் அமைச்சர் நிதின் கட்காரியை சந்தித்து அவரிடம் தொகுதி வளர்ச்சிக்காக நிதி ஒதுக்குமாறு கேட்கப் போகிறேன். மேலும் தன்னுடைய தொகுதி வளர்ச்சிக்காக என்னுடைய உடல் எடையை மீண்டும் குறைக்க சொன்னால் கூட நான் தாராளமாக குறைப்பேன் என்று கூறியுள்ளார்.