மத்தியில் பிரதமர் மோடி தலைமையிலான பா.ஜனதா அரசு பதவியேற்று 8 வருடங்கள் நிறைவடைந்திருக்கிறது. இதனை முன்னிட்டு மத்திய அரசின் தோல்விகளை பட்டியலிட்டு காங்கிரஸ் கட்சி அறிக்கை ஒன்றை வெளியிட்டுள்ளது. அதிலும் குறிப்பாக நாடு முழுதும் லட்சக்கணக்கான காலிப்பணியிடங்கள் இருப்பதாக சுட்டிக்காட்டியுள்ள காங்கிரஸ் கட்சி, இவற்றையெல்லாம் நிரப்ப நடவடிக்கை மேற்கொள்ளாத மத்திய அரசை கடுமையாக குற்றம்சாட்டியுள்ளது. காங்கிரஸ் வெளியிட்டுள்ள அந்த காலியிடப் பட்டியலில் முக்கியமாக மத்திய அமைச்சகங்கள் மற்றும் துறைகளில் 9 லட்சத்துக்கு மேற்பட்ட பணியிடங்கள் காலியாக இருப்பதாக கூறப்பட்டுள்ளது.
அதுமட்டுமல்லாமல் பொதுத்துறை வங்கிகளில் 2 லட்சம் காலியிடங்கள், 1.68 லட்சம் சுகாதார ஊழியர் பணியிடங்கள் மற்றும் 1.76 அங்கன்வாடி பணியாளர் பணியிடங்கள் காலியாக இருப்பதாகவும் குறிப்பிடப்பட்டுள்ளது. இதேபோன்று ராணுவத்தில் 2.55 லட்சம் பணியிடங்களும், மத்திய ஆயுதப்படைகளில் 91,929 பணியிடங்களும், மாநில போலீஸ் துறையில் 5.31 லட்சம் பணியிடங்களும், பல கோர்ட்டுகளில் 5 ஆயிரம் பணியிடங்களும் காலியாக உள்ளதாக குற்றம் சாட்டியுள்ள காங்கிரஸ் கட்சி, மாநில அரசுகளின் பல துறைகளில் 30 லட்சத்துக்கு மேற்பட்ட காலியிடங்கள் இருப்பதாகவும் சுட்டிக்காட்டியுள்ளது. இப்பட்டியலை வெளியிட்ட கட்சியின் செய்தி தொடர்பாளர் ரந்தீப் சுர்ஜேவாலா, இளைஞர்கள் பணிக்காக ஏங்குவதாகவும், எனினும் அரசுகள் காலியிடங்களை நிரப்பவில்லை என்றும் குற்றம் சாட்டினார்.
அதே சமயம் மத்தியில் மோடி அரசு பதவியேற்ற இந்த 8 வருடங்களில் நாடு முழுதும் மத மோதல்கள் அதிகரித்து உள்ளதாக அவர் குற்றம் சாட்டினார். அந்த அடிப்படையில் சென்ற 2016-2020 ஆம் ஆண்டு காலத்தில் 3,400 மதக்கலவரங்கள் நடந்து இருப்பதாக உள்துறை அமைச்சகம் கூறியிருப்பதை சுட்டிக்காட்டிய அவர், ஆனால் 8 வருடகால பா.ஜனதா ஆட்சியில் நடந்துள்ள மதக்கலவரங்களின் எண்ணிக்கையானது 10 ஆயிரத்தை தாண்டும் எனவும் கூறினார். சென்ற 2015-2020 வரையிலான காலகட்டத்தில் தலித் பிரிவினர் மீதான வன்முறை 12 சதவீதம் அதிகரித்து உள்ளதாக தெரிவித்த அவர், கடந்த 8 ஆண்டுகளில் காஷ்மீரில் 548 பாதுகாப்பு படையினர், 324 பொதுமக்கள் கொல்லப்பட்டு இருப்பதாகவும், இந்திய-சீன எல்லை தொடர்ந்து பதற்றத்தில் உள்ளதாகவும் குற்றம் சாட்டினார்.