கமல்ஹாசன் புகழ்பெற்ற இந்தியத் திரைப்பட நடிகர் ஆவார். இவர் நடிகராக மட்டுமல்லாது திரைக்கதையாசிரியர், இயக்குநர், பாடலாசிரியர், பின்னணிப்பாடகர், நடன அமைப்பாளர் எனப் பன்முகத்தன்மை கொண்டவராக விளங்குகின்றார். கமல்ஹாசன், தமிழ் தவிர இந்தி, தெலுங்கு, மலையாளம், கன்னடம், வங்காளம் ஆகிய மொழித் திரைப்படங்களிலும் நடித்துள்ளார். ராஜ்கமல் பிலிம்ஸ் என்ற திரைப்படத் தயாரிப்பு நிறுவனத்தையும் நடத்தி வருகின்றார். தற்போது இயக்குனர் லோகேஷ் கனகராஜ் இயக்கத்தில் கமலஹாசன் நடிப்பில் ‘விக்ரம்’ என்ற திரைப்படம் உருவாகியுள்ளது.
இந்த திரைப்படத்தில் விஜய் சேதுபதி, பகத் பாசில், நரேன், அர்ஜுன் தாஸ், காளிதாஸ் ஜெயராம் உள்ளிட்ட பலர் நடித்துள்ளனர். இந்த படத்தை கமல்ஹாசன் தனது சொந்த தயாரிப்பு நிறுவனமான ராஜ்கமல் பிலிம்ஸ் நிறுவனம் மூலம் தயாரிக்கிறார். அதுமட்டுமில்லாமல் இந்த திரைப்படத்திற்கு அனிருத் இசையமைத்து கிரீஸ் கங்காதரன் ஒளிப்பதிவு செய்துள்ளார். மேலும் ‘விக்ரம்’ திரைப்படம் வருகின்ற ஜூன் 3ம் தேதி வெளியாக உள்ளது. அதனைத் தொடர்ந்து இந்த திரைப்படத்தில் இருந்து கமல்ஹாசன் எழுதி பாடியுள்ள ‘பத்தல பத்தல’ என்ற பர்ஸ்ட் சிங்கிள் வெளியாகி நல்ல வரவேற்பு மற்றும் சர்ச்சைகளை சந்தித்தது.
இந்நிலையில் நேற்று ‘விக்ரம்’ திரைப்படத்தின் இசை மற்றும் டிரைலர் வெளியீட்டு விழா சென்னையில் உள்ள நேரு உள்விளையாட்டு அரங்கில் நடைபெற்றது. இதில் இயக்குனர் பா.ரஞ்சித், பார்த்திபன், கமல்ஹாசன், விஜய் சேதுபதி, உதயநிதி ஸ்டாலின், சிலம்பரசன் உள்ளிட்ட பலர் கலந்து கொண்டனர். அதனை தொடர்ந்து விக்ரம் திரைப்படத்தின் டிரைலர் வெளியாகி ரசிகர்களிடம் மிகச்சிறந்த வரவேற்பைப் பெற்று வருகிறது. அதுமட்டுமில்லாமல் கோடிக்கணக்கான பார்வையாளர்களை கடந்து யூடிபில் முதலிடத்தில் உள்ளது. இதனால் இந்த திரைப்படம் ரசிகர்கள் மத்தியில் எதிர்பார்ப்பை அதிகப்படுத்தியுள்ளது. இந்த டிரைலர் சமூக வலைத்தளத்தில் வைரலாகி வருகிறது.