இயக்குனர் மணி ரத்னத்திடம் உதவி இயக்குனராக சுதா கொங்கரா பணிபுரிந்தார் . இவர் சென்ற 2010-ம் வருடம் வெளியாகிய துரோகி படம் வாயிலாக தமிழ் திரையுலகிற்கு இயக்குனராக அறிமுகமானார். இதையடுத்து கடந்த 2016-ம் வருடம் இவர் இயக்கத்தில் வெளியாகிய இறுதிச் சுற்று படம் நல்ல வரவேற்பை பெற்றதோடு தேசிய விருது உட்பட பல்வேறு விருதுகளை வென்று குவித்தது. இவர் இயக்கத்தில் சூர்யா நடிப்பில் கடந்த ஆண்டு வெளியாகிய சூரரைப்போற்று படம் ரசிகர்கள் மத்தியில் மிகப்பெரிய வரவேற்பை பெற்றது. இந்த படத்தின் வாயிலாக அவர் தமிழ் சினிமாவின் தவிர்க்க முடியாத இயக்குனராக உயர்ந்தார்.
இந்நிலையில் சுதாகொங்கராவின் அடுத்த திரைப்படம் தொடர்பான அறிவிப்பு வெளியாகியுள்ளது. இந்திய சினிமாவில் வசூல் சாதனையும் நல்ல வரவேற்பையும் பெற்ற “கே.ஜி.எஃப்” படத்தை தயாரித்த ஹோம்பலே பிலிம்ஸ் நிறுவனம் தயாரிக்கும் புது படத்தை இயக்குனர் சுதா கொங்கரா இயக்கவுள்ளார். இது தொடர்பான அறிவிப்பை அந்நிறுவனம் சமூக வலைத்தளத்தில் பதிவிட்டுள்ளது. இத்திரைப்படம் உண்மை கதையை மையமாக வைத்து உருவாக இருப்பதாக பட நிறுவனம் தெரிவித்துள்ளது. இதற்கு முன்பாக சுதாகொங்கராவின் இயக்கத்தில் வெளியாகிய சூரரைப்போற்று படம் கேப்டன் கோபிநாத் வாழ்க்கையை தழுவி எடுக்கப்பட்ட திரைப்படம் ஆகும். தற்போது வெளியாகி உள்ள இந்த அறிவிப்பும் உண்மை கதையை மையமாக வைத்து எடுக்கப்பட இருப்பதால் ரசிகர்கள் சமூக வலைத்தளங்களில் உற்சாகத்துடன் பதிவிட்டு வருகின்றனர்.