உக்ரைன் போர் விமானங்கள் மற்றும் போர் விமானங்களை பழுதுபார்க்கும் அமைப்புகளை பெற்றிருப்பதாக அமெரிக்க பாதுகாப்பு தலைமை அலுவலகம் பென்டகன் அறிவித்துள்ளது.
உக்ரைனில் ரஷ்யாவின் தாக்குதல் போர் மேலும் தீவிரமடைந்திருக்கின்ற நிலையில், உக்ரைனுக்கு பலம் சேர்க்கும் வகையில் போர் விமானங்கள் மற்றும் போர் விமானங்களை பழுது பார்க்கும் தொழில்நுட்ப அமைப்புகள் சென்றடைந்து இருப்பதாக அமெரிக்காவின் பென்டகன் அலுவலகம் தெரிவித்திருக்கிறது.
இது பற்றி கருத்து தெரிவித்துள்ள பென்டகன் செய்தி தொடர்பாளர் ஜான் கிர்பி, உக்ரைனுக்கு போர் விமானங்கள் சென்றடைந்து இருப்பதை உறுதி செய்திருக்கிறார். இருந்த போதிலும் எந்தெந்த நாடுகள் போர் விமானங்களை வழங்கியுள்ளது என்பதை தெரிவிக்க மறுத்துவிட்டார்.
ஆனால் இரண்டு வாரங்களுக்கு முன் உக்ரைனில் இருந்த போர் விமானங்களின் எண்ணிக்கையை விட தற்போது அதன் எண்ணிக்கை அதிகமாக இருப்பதாக கூறியுள்ளார். மேலும் உக்ரைனுக்கு அமெரிக்கா முழுமையான எந்தவொரு போர் விமானங்களையும் வழங்கவில்லை ஆனால் போர் விமானங்களுக்கு தேவையான உதிர் பாகங்களை வழங்கியுள்ளதாக கூறியுள்ளார்.
இந்நிலையில் 50 நாள்களை கடந்து இருக்கும் உக்ரைன் போரில் அமெரிக்கா மற்றும் அதன் நட்பு நாடுகள் வழங்கிய வான் தாக்குதல் ஏவுகணைகள் இன்னமும் துடிப்புடன் பயன்பட்டு வருகின்றது. இதனை தொடர்ந்து ரஷ்யாவில் தயாரிக்கப்பட்டு ஒருகாலத்தில் ஆப்கானிஸ்தானில் பயன்படுத்தப்பட்ட ஹெலிகாப்டர்களை உக்ரைனுக்கு வழங்க போவதாக அமெரிக்கா தெறிவித்துள்ளது.