குவைத் நாட்டில் விஜய்யின் பீஸ்ட் படத்தை ரிலீஸ் செய்வதற்கு தடை விதிக்கப்பட்டுள்ளது.
மாஸ்டர் திரைப்படத்தின் வெற்றிக்கு பிறகு நடிகர் விஜய் நடித்த திரைப்படம் பீஸ்ட். இந்த படத்தை நெல்சன் திலீப் குமார் இயக்கியுள்ளார். இப்படத்தில் விஜய்க்கு ஜோடியாக பூஜா ஹெக்டே மற்றும் வில்லனாக ஷான் டாம் சாக்கோவும் நடித்துள்ளார். மேலும் செல்வராகவன், விடிவி கணேஷ், அபர்ணா தாஸ், யோகிபாபு உள்ளிட்ட முக்கிய பிரபலங்கள் இந்த படத்தில் நடித்துள்ளனர்.
தமிழில் தயாராகியுள்ள பீஸ்ட் திரைப்படம் தெலுங்கு, மலையாளம், இந்தி, கன்னடம் உள்ளிட்ட மொழிகளில் டப்பிங் செய்யப்பட்டு வெளியிடப்பட்டுள்ளது. இந்த படம் வருகிற ஏப்ரல் 13-ஆம் தேதி திரையரங்களில் வெளியாக உள்ளது. பீஸ்ட் படத்தின் ரிலீஸ் நெருங்கி வருவதால் அந்த படத்தின் புரமோஷன் வேலைகளில் படக்குழுவினர் தீவிரமாக ஈடுபட்டு வருகின்றனர். இந்நிலையில் பீஸ்ட் படத்துக்கு குவைத் நாட்டு அரசு தடை விதித்துள்ளது. ஏனெனில் பீஸ்ட் திரைப்படத்தில் இஸ்லாமியர்களை பயங்கரவாதிகள் போல் சித்தரிக்கும் காட்சிகள் இடம் பெற்றுள்ளதால், இந்த படத்தை அங்கு வெளியிட தடை விதிக்கப்பட்டுள்ளதாக கூறப்படுகிறது. இதனால் படத்தின் வசூல் பாதிக்கும் எனவும் தெரிவிக்கப்பட்டுள்ளது.