சென்னை வள்ளுவர் கோட்டத்தில் தஞ்சாவூர் மாணவியின் மரணத்திற்கு நீதி கேட்டு பாஜகவினர் போராட்டம் நடத்தினர் அப்போது பாஜக எம்எல்ஏ நயினார் நாகேந்திரன் பேசியது சர்ச்சையை கிளப்பியது. இதுகுறித்து நயினார் நாகேந்திரன் தனது ட்விட்டர் பக்கத்தில் விளக்கம் அளித்துள்ளார்.
தஞ்சை மாணவி தற்கொலை தொடர்பாக நீதி கிடைக்க வேண்டி பாஜக சார்பில் சென்னை வள்ளுவர் கோட்டத்தில் உண்ணாவிரத போராட்டம் நடைபெற்றது. இதில் கலந்து கொண்ட எம்எல்ஏ நயினார் நாகேந்திரன் பேசியது சர்ச்சையை ஏற்படுத்தியது. அதில் அவர் கூறியிருந்ததாவது, திமுக ஆட்சி முடிய இன்னும் நான்கு ஆண்டுகள் உள்ளன. ஆனால் இன்னும் நான்கு ஆண்டுகளுக்கு திமுக ஆட்சி நீடிக்குமா என்பது சந்தேகம்தான். சட்டமன்றத்தில் ஆண்மையோடு பேசக்கூடிய அதிமுகவினர் ஒருவர் கூட இல்லை. நான்கு பேர் இருந்தாலும் பாஜகவினர் தான் வாய்திறக்க வேண்டியுள்ளது. நாங்கள் எதிர்க்கட்சியாக இல்லாவிட்டாலும் அண்ணாமலை தைரியமாக செய்தியாளர்களிடம் எதை வேண்டுமானாலும் கூறுவார். சட்டமன்றத்தில் அதிமுக எதிர்க்கட்சிஅல்ல. பாஜகதான் எதிர்க்கட்சி போல செயல்படுகிறது.” எனக் கூறினார்.
நயினார் நாகேந்திரன் இந்த பேச்சு அதிமுகவினரை கடுமையாக அதிர்ச்சியடைய வைத்தது. இதற்குப் பிறகும் பாஜக உடனான இந்த கூட்டணி தேவைதானா என எம் பி கே.சி பழனிச்சாமி உள்ளிட்ட பலரும் கூறியிருந்தனர்.
இதுகுறித்து பாஜக எம்எல்ஏ நயினார் நாகேந்திரன் தன்னுடைய ட்விட்டர் பக்கத்தில் விளக்கம் அளித்துள்ளார். அதில் அவர்,வள்ளுவர் கோட்டத்தில் நான் பேசியது தவறாக புரிந்து கொள்ளப்பட்டது மற்றபடி எனக்கு எந்த உள்நோக்கமும் இல்லை எனவும் போராட்டத்தில் நியாயம் கிடைக்க வேண்டும் என எண்ணியே நான் பேசினேன் தவிர எந்த உள்நோக்கமும் இல்லை என கூறியுள்ளார். அதிமுகவை மேடையில் மைக் போட்டு வெளிப்படையாக பேசி விட்டு, நான் பேசியதில் எந்தத் தவறும் இல்லை என ட்விட்டர் பக்கத்தில் விளக்கம் அளிப்பது எந்த வகையில் நியாயம் என அதிமுகவினர் கொந்தளித்து வருகின்றனர்.