இந்தியாவுக்கு எதிரான முதல் 2 டெஸ்ட் போட்டிக்கான இங்கிலாந்து அணியில் முக்கிய வீரர்கள் இடம்பெறவில்லை .
இங்கிலாந்தில் சுற்றுப்பயணம் மேற்கொண்டுள்ள விராட் கோலி தலைமையிலான இந்திய அணி இங்கிலாந்துக்கு எதிரான 5 டெஸ்ட் போட்டிகளில் விளையாடுகிறது. இதில் முதல் டெஸ்ட் போட்டி நாட்டிங்காமில் அடுத்த மாதம் 4-ம் தேதியும், 2-வது டெஸ்ட் போட்டி லண்டனில் 12-ஆம் தேதியும் நடைபெற உள்ளது. இந்நிலையில் இந்தியாவுக்கு எதிரான முதல் 2 டெஸ்ட் போட்டிகளில் இடம்பெற்றுள்ள இங்கிலாந்து அணியின் வீரர்களின் பட்டியல் நேற்று அறிவிக்கப்பட்டுள்ளது.
பாகிஸ்தானுக்கு எதிரான டி20 போட்டியில் இருந்து ஓய்வு அளிக்கப்பட்ட ஆல்ரவுண்டரான பென் ஸ்டோக்ஸ் அணியில் இடம்பெற்றுள்ளார். இதையடுத்து ட்விட்டரில் ஆபாசக் கருத்தை பதிவிட்ட சர்ச்சையில் சிக்கி இடைநீக்கம் செய்யப்பட்ட வேகப்பந்து வீச்சாளர் ஒல்லி ராபின்சன் அணியில் இடம்பெற்றுள்ளார். மேலும் தொடக்க வீரரான ஹசீப் ஹமீது 5 ஆண்டுகளுக்குப் பிறகு மீண்டும் அணிக்கு திரும்பியுள்ளார் .ஆனால் அணியில் வேகப்பந்து வீச்சாளர் ஜோப்ரா ஆர்ச்சர் மற்றும் ஆல்ரவுண்டரான கிறிஸ் வோக்ஸ் இருவரும் காயத்தில் இருந்து மீளாததால் அணியில் இடம்பெறவில்லை.