நாட்டின் மிகவும் உயர்ந்த அதிகாரம் படைத்த நீதிமன்றமாக உச்ச நீதிமன்றம் உள்ளது. இதில் ஒரு தலைமை நீதிபதி உட்பட 34 நீதிபதிகள் உள்ளனர். இந்த நீதிபதிகள் மாதம் ரூ.2.5 லட்சம் சம்பளம் பெறுகின்றனர். தினசரி அடிப்படையில் பார்த்தால், இவர்கள் ஒருநாளைக்கு ரூ.8,333 சம்பளம் பெறுகின்றனர். ஆனால், ஒரு நாளைக்கு இவர்கள் ஒவ்வொருவரும் தலா 40 வழக்குகளை விசாரிக்கின்றனர். இவர்களின் ஒருநாள் சம்பளத்தை வைத்து கணக்கிட்டால், ஒரு வழக்கிற்கு இவர்கள் பெறும் சம்பளம் ரூ.208 மட்டுமே. அது, பொதுநலன் வழக்காக இருந்தாலும் சரி, இந்திய அரசியலமைப்பு சட்டத்துக்கு சவால் விடும் வழக்காக இருந்தாலும் சரி… ஒரே சம்பளம்தான். அதாவது, ஒரு வழக்கிற்கு ரூ.208 மட்டுமே.
ஆனால், இதற்கு நேர்மாறாக இந்த வழக்குகளில் வாதிடும் மூத்த வழக்கறிஞர்கள், ஒரு வழக்கில் வாதிடுவதற்கு மட்டுமே ரூ,1 லட்சம் முதல் ரூ.5 லட்சம் வரை சம்பளம் பெறுகின்றனர். அதே நேரம், சிங்வி, கபில்சிபல், முகுல் ரோத்தகி, ஹரிஸ் சால்வே போன்ற மிக பிரபலமான வழக்கறிஞர்கள் வாதிட்டால், ஒருநாளைக்கு, ஒரு வழக்கிற்கு ரூ.10 லட்சம் முதல் ரூ.20 லட்சம் வரை சம்பளம் பெறுகின்றனர். வழக்கில் வெற்றி பெறுகிறார்களோ, இல்லையோ… ஆஜராகி வாதிட்டாலே இந்த கட்டணம் அவர்களுக்கு கிடைத்து விடும். ஆனால், வழக்கின் தீர்ப்பையே முடிவு செய்யக் கூடிய நீதிபதி, ஒரு வழக்கிற்கு ரூ.208 மட்டுமே பெறுகிறார் என புள்ளி விவரங்கள் கூறுகின்றன.