டி20 உலக கோப்பை போட்டி அக்டோபர் 17 ஆம் தேதி முதல் நவம்பர் 14ஆம் தேதி வரை நடைபெறும் என்று ஐசிசி தெரிவித்துள்ளது .
7 -வது டி20 உலகக் கோப்பை போட்டி இந்தியாவில் வருகிற அக்டோபர் , நவம்பர் மாதங்களில் நடத்த திட்டமிடப்பட்டிருந்தது. ஆனால் தற்போது இந்தியாவில் கொரோனா தொற்று பரவல் அதிகரித்திருப்பதை கருத்தில் கொண்டு மாற்று இடமாக ஐக்கிய அரபு அமீரகத்தை ஐசிசி தேர்வு செய்துள்ளது. இந்த உலகக் கோப்பை டி20 போட்டியில் இந்தியாவில் நடத்துவதற்கான சூழலை ஆய்வு செய்து முடிவெடுக்க பிசிசிஐ-க்கு ஜூன் 28ஆம் தேதி வரை ஐசிசி கால அவகாசம் அளித்திருந்தது.
இந்த நிலையில் டி20 உலகக் கோப்பை போட்டி ஐக்கிய அரபு அமீரகத்திற்கு மாற்றப்பட்டுள்ளதாகவும் இந்தப் போட்டிகள் அக்டோபர் 16ஆம் தேதி முதல் நவம்பர் 17ஆம் தேதி வரை நடக்க இருப்பதாகவும் தகவல்கள் வெளியாகின. இந்நிலையில் டி20 உலகக்கோப்பை போட்டி வருகிற அக்டோபர் 17 ஆம் தேதி முதல் நவம்பர் 14 ஆம் தேதி வரை நடைபெற இருப்பதாக ஐசிசி அறிவித்துள்ளது. அத்துடன் இந்த போட்டிகள் ஐக்கிய அரபு அமீரகம் மற்றும் ஓமனில் நடைபெறும் என்று ஐசிசி தெரிவித்துள்ளது .