மறைந்த முன்னாள் முதலமைச்சர் ஜெயலலிதாவின் வாழ்க்கை வரலாறு படம் தலைவி . விஜய் இயக்கத்தில் கங்கனா ரனாவத், அரவிந்த்சாமி, பிரகாஷ்ராஜ் மற்றும் பலர் இப்படத்தில் நடித்துள்ளனர். ஜெயலலிதாவின் பிறந்தநாள் முன்னிட்டு படத்தின் வெளியீட்டு தேதியை அறிவித்தார். ஏப்ரல் 23ஆம் தேதி இப்படம் வெளியாக உள்ளது. ஆனால் படம் திட்டமிட்டபடி வெளியாகுமா என்ற சந்தேகம் எழுந்துள்ளது. தமிழ்நாட்டில் விரைவில் சட்டமன்றத் தேர்தல் வரவுள்ள நிலையில் அதற்கான எந்த அறிவிப்பும் வெளியாகவில்லை. ஏப்ரல் மாதக் கடைசியிலோ அல்லது மே மாதம் முதல் வாரத்தில் தேர்தல் நடைபெறும் என்று தெரிவிக்கப்பட்டுள்ளது.
தலைவி படம் வெளியாகும் ஏப்ரல் 23ஆம் தேதிக்கு முன்பாக தேர்தல் நடந்தால் எந்தவித சர்ச்சையும் எழ வாய்ப்பில்லை. ஆனால் அதற்குப் பிறகு தேர்தல் தேதி இருந்தால் எதிர்க்கட்சிகள் இதை சர்ச்சையாக்க வாய்ப்புள்ளது. படம் வெளிவந்தால் அது அதிமுக கட்சிக்கு ஒரு மறைமுக பிரச்சாரமும் அமையலாம். எனவே மற்ற கட்சிகள் பட வெளியீட்டுக்கு தடை கூறவும் செய்யலாம். இதற்கு முன்பு தேர்தல் காலங்களில் இப்படி அரசியல் தலைவர்களின் படங்கள் வெளியான போது அவற்றிற்கு தடைவிதித்த வரலாறும் இருந்துள்ளது. இதன் காரணமாக தலைவி திட்டமிட்டபடி வெளியாகுமா என்ற சந்தேகம் எழுந்துள்ளது.