ராமர் கோவில் பூமி பூஜை நடத்தி எத்தனை பேரை மருத்துவமனைக்கு அனுப்பி வைப்பீர்கள் என்று காங்கிரஸ் மூத்த தலைவர் கேள்வி எழுப்பியிருக்கிறார்.
கடந்த வருடம் நவம்பர் மாதம் ஒன்பதாம் தேதி அயோத்தி வழக்கில் தீர்ப்பளித்த உச்சநீதிமன்றம், அயோத்தியில் சர்ச்சையை ஏற்படுத்திய 2.77 ஏக்கர் நிலப்பரப்பில் ராமர் கோயில் கட்டுவதற்கு அனுமதி அளித்தது.கோவில் கட்டுவதற்கு அறக்கட்டளையை மூன்று மாதங்களுக்குள் உருவாக்க வேண்டும் என்று மத்திய அரசு உத்தரவிட்டது. அதனைத் தொடர்ந்து அயோத்தியில் ராமர் கோயில் கட்டுவதற்காக மத்திய அரசு ஸ்ரீராம ஜென்மபூமி தீர்த்த ஷேத்ரா என்ற அறக்கட்டளையை உருவாக்கியுள்ளது. அந்த அறக்கட்டளையின் மூலமாக ராமர் கோவில் கட்டுவதற்கான அனைத்து பணிகளையும் மேற்கொண்டு வருகின்றன.வருகின்ற ஆகஸ்ட் 3ம் தேதி முதல் 5ஆம் தேதி வரையில் அயோத்தியில் ராமர் கோயில் கட்டுவதற்கான பூமிபூஜை நிகழ்ச்சிகள் நடக்கவுள்ளன.
இதனைத் தொடர்ந்து ஆகஸ்ட் 5 ஆம் தேதி பிரதமர் நரேந்திர மோடி ராமர் கோவிலில் அடிக்கல் நாட்ட உள்ளார். மேலும் பல்வேறு மாநில முதல்வர்களும், மத்திய அமைச்சர்களும், ஆர்.எஸ்.எஸ் தலைவர் மோகன் பகவத் உள்ளிட்டோரும் நிகழ்ச்சியில் பங்கேற்பார்கள் என்று தகவல்கள் வெளியாகியுள்ளன. இந்நிலையில் காங்கிரஸ் கட்சியின் மூத்த தலைவர் திக்விஜய் சிங் கூறும்போது, ” அயோத்தியில் ராமர் கோயில் கட்டுமான பணிக்கான பூமி பூஜை தொடக்க விழாவை கட்டாயம் தள்ளி வைக்க வேண்டும் என்று பலரும் கோரிக்கை விடுத்துள்ளனர். அது நல்ல நேரம் இல்லை என்பதையும் பலர் கூறியுள்ளனர்.
அதேசமயத்தில் அயோத்தியில் கோயில் தொடர்புடைய பலருக்கும் கொரோனா பரவியுள்ளது. அதனால் விழாவை நிறுத்த வேண்டும். உ.பி.முதல்வர் யோகி ஆதித்யநாத்தும் இதனைப் பற்றி பிரதமர் மோடியை தொடர்பு கொண்டு கட்டாயம் வலியுறுத்த வேண்டும். பிரதமர் மோடிக்கு பொருத்தமான நாள் என்பதால் அந்த நாளை தேர்வு செய்திருக்கிறார். அந்த நாள் பூமி பூஜை செய்வதற்கு ஏற்ற நாள் இல்லை என்று மடாதிபதிகள் கூறியுள்ளனர். ராமர் கோயில் பூமி பூஜை நடத்தி எத்தனை பேருக்கு கொரோனா தொற்றை உண்டாக்கி மருத்துவமனைக்கு அனுப்பி வைப்பீர்கள். சனாதன தர்மத்தை மீறி நீங்கள் எவ்வாறு செயல்படுகிறீர்கள். அப்படி என்ன நிர்ப்பந்தம் உங்களுக்கு” என்று கூறியுள்ளார்.