70 லட்சம் இந்திய டெபிட் மற்றும் கிரெடிட் கார்டுகள் வைத்திருப்பவர்களின் தகவல்கள் கசிந்து உள்ளதாக பாதுகாப்பு ஆய்வாளர் ஒருவர் கூறியுள்ளார்.
இந்தியர்களின் 70 லட்சம் கிரெடிட் கார்டு மற்றும் டெபிட் கார்டு தகவல்கள் ஆன்லைனில் வெளியாகி இருப்பதாக
ஒரு அதிர்ச்சிகரமான தகவல் வெளியாகியுள்ளது. இந்த தகவலை தனியார் இணைய பாதுகாப்பு ஆய்வாளர் ராஜ்சேகர் ராஜஹாரியா தெரிவித்துள்ளார்.
கிரெட், டெபிட் கார்டு வைத்துள்ள 70 லட்சம் இந்தியர்களின் வருமானம் தொலைபேசி எண்கள், பான் எண்கள், வங்கி கணக்கு விபரங்கள் போன்றவற்றுடன் இணையத்தில் வெளியாகி இருப்பதாக தகவல்கள் வெளியானது. அவை அனைத்தும் டார்க் வெப் (Dark web) ரகசிய இணைய பக்கங்களில் வெளியாகி இருப்பதாக தனியார் இணைய பாதுகாப்பு ஆய்வாளர் ராஜ்சேகர் ராஜஹாரியா கூறியுள்ளார். இந்த பட்டியலில் முழுமையான கிரெடிட் கார்டு எண்கள் தரப்படவில்லை என்றபோதும், ஒரு பயனாளரின் பெயர், பிறந்த தேதி, வருமானம், அவர் வசிக்கும் நகரம் உள்ளிட்ட தகவல்கள் இடம் பெற்றுள்ளன.
இந்த தகவல்களை விற்பனைக்காக ஹேக்கர்கள் வெளியிட்டிருக்கலாம் என்றும், வங்கிகளுடன் இணைந்து பணியாற்றும் நிறுவனங்களின் தரவு சேகரிப்பு தளங்களில் உள்ள குறைபாடுகள் காரணமாக இந்த தகவல்கள் வெளியாகி இருக்கலாம் என்றும் கூறப்படுகிறது. இதே போல் கடந்த ஆண்டு 13 லட்சம் பேரின் தகவல்கள் டார்க் வெப்பில் விற்பனைக்கு வைக்கப்பட்டது குறிப்பிடத்தக்கது.