ஒலியைவிட 5 மடங்கு வேகத்தில் போகும் ஹைபர்சோனிக் விமானத்தினை தயாரிப்பதற்கு திட்டமிட்டுள்ள பிரிட்டன் விண்வெளி முகமை அதற்கான ஆராய்ச்சி மற்றும் பணியில் ஈடுபட்டு இருக்கிறது. உயர் தொழில்நுட்பம் கொண்ட இந்த வகை விண்வெளி விமானங்கள் 2030ஆம் வருடத்திற்குள் பயன்பாட்டுக்கு வரக்கூடும் என்று தெரிவித்துள்ளது. மணிக்கு 4 ஆயிரம் மைல்கல் வரையிலும் வேகமுள்ள இந்த விமானத்தில் நியூயார்க்கில் இருந்து லண்டனுக்கு ஒரு மணி நேரத்தில் செல்லலாம் என தெரிவித்துள்ளது. இந்த விமானத்தைத் தயாரிப்பதற்காக ஆஸ்திரேலியாவுடன் இணைந்து செயல்பட்டு வருவதாக பிரிட்டன் விண்வெளி முகமை தலைமை செயல் அதிகாரி கிரகாம் டர்னாக் தெரிவித்துள்ளார்.
ஹைட்ரஜன் ஆக்சிஜன் கலவையை எரிபொருளாகக் கொண்டு செயல்படும் சாப்ரே எனப்படும் எஞ்சின் பயன்பாட்டுக்கு வந்தால் தற்போது உள்ளதை விட விமானப் போக்குவரத்துச் செலவும், அதில் வெளியாகும் மாசும் குறையும். ஹைபர்சோனிக் விமானம் அதிவேகத்தில் செல்லும்போது காற்றின் வெப்பத்தால் அதன் எஞ்சின் இளகி உருகிவிட வாய்ப்பிருக்கிறது. சாப்ரே எஞ்சின் உள்ளிழுக்கும் காற்று ஹீலியத்தால் குளிரூட்டப்பட்ட நுண் குழாய்கள் வழியே வரும்போது ஆயிரம் டிகிரி செல்சியஸ் வெப்பத்தில் வரும் காற்று நொடியில் இருபதில் ஒரு பங்கு நேரத்தில் பூஜ்ஜியம் டிகிரி செல்சியஸ் குளிர்நிலைக்கு வந்துவிடும். அந்தக் காற்றில் வரும் வெப்பம் என்ஜினுக்கு ஆற்றலாக பயன்படுத்தப்படும் என பொறியாளர் தெரிவித்துள்ளார்.