இயக்குனர் பூரிஜெகன்நாத் இயக்கத்தில் விஜய் தேவரகொண்டா நடித்த திரைப்படம் லைகர். இப்படத்தில் விஜய் தேவரகொண்டா குத்துச் சண்டை வீரராக நடித்து இருக்கிறார். அவருடன் பிரபல குத்துச்சண்டை வீரர் மைக் டைசனும் நடித்து இருக்கிறார். அத்துடன் இப்படத்தில் அனன்யா பாண்டே, ரம்யா கிருஷ்ணன் ஆகியோர் முக்கிய கதாபாத்திரத்தில் நடித்து உள்ளனர். மிகப் பெரிய பொருட்செலவில் உருவாகியுள்ள இப்படம் தமிழ், தெலுங்கு என பலமொழிகளில் ஆகஸ்ட் 25-ஆம் தேதி வெளியாகி கலவையான விமர்சனங்களை பெற்றது.
லைகர் படத்தைத் அடுத்து பூரிஜெகன்நாத் இயக்கத்தில் விஜய் தேவரகொண்டா ஜனகணமன என்ற திரைப்படத்தில் நடிப்பதாக அண்மையில் அறிவிக்கப்பட்டிருந்தது. சார்மி கவுர், வம்சி பைட்டிப்பள்ளி, மற்றும் பூரி ஜெகன்நாத் இணைந்து தயாரிக்கும் இந்த படத்தின் பர்ஸ்ட் லுக் கடந்த சில மாதங்களுக்கு முன் வெளியாகியது. இந்த நிலையில் லைகர் திரைப்படத்தின் தோல்வியின் காரணமாக ஜனகணமன படத்தின் தயாரிப்பாளர்களில் ஒருவர் படத்தில் இருந்து விலகுவதாக கூறப்படுகிறது. இதனால் பூரிஜெகன்நாத் மற்றும் விஜய் தேவரகொண்டா பேச்சுவார்த்தை நடத்தி இந்த படத்தை கைவிட முடிவு செய்துள்ளதாக தகவல் வெளியாகியுள்ளது.