ராஜமௌலியின் ஆர்.ஆர்.ஆர் படத்தின் படப்பிடிப்பு நிறைவடைந்துள்ளதாக தகவல் வெளியாகியுள்ளது.
பிரபல இயக்குனர் ராஜமௌலி தற்போது ‘ஆர்.ஆர்.ஆர்’ என்ற பிரம்மாண்ட படத்தை இயக்கி வருகிறார். விடுதலைப் போராட்ட வீரர்களின் வாழ்க்கையை மையமாக வைத்து உருவாகி வரும் இந்த படத்தில் தெலுங்கு நடிகர்கள் ராம் சரண், ஜூனியர் என்.டி.ஆர் இருவரும் கதாநாயகர்களாக நடிக்கின்றனர். மேலும் இந்த படத்தில் ஆலியா பட், ஸ்ரேயா சரண், அஜய் தேவ்கன், சமுத்திரக்கனி உள்ளிட்ட பலர் முக்கிய கதாபாத்திரங்களில் நடிக்கின்றனர். இந்த படத்தின் இறுதிகட்ட படப்பிடிப்பு உக்ரைன் நாட்டில் விறுவிறுப்பாக நடைபெற்று வந்தது. இந்நிலையில் ஆர்.ஆர்.ஆர் படத்தின் படப்பிடிப்பு தற்போது முழுமையாக நிறைவடைந்துள்ளது.
இதனை படக்குழுவினர் அனைவரும் கேக் வெட்டி கொண்டாடியுள்ளனர். மேலும் தமிழ், தெலுங்கு, ஹிந்தி, மலையாளம், கன்னடம் ஆகிய மொழிகளில் தயாராகி வரும் இந்த படம் அக்டோபர் 13-ஆம் தேதி ரிலீஸாகும் என படக்குழு அறிவித்திருந்தது. ஆனால் தற்போது கொரோனா பரவல் காரணமாக தமிழகம், கேரளா உள்ளிட்ட மாநிலங்களில் தியேட்டர்கள் திறக்கப்படாததால் இந்த படத்தின் ரிலீஸ் தேதியை மாற்ற படக்குழு திட்டமிட்டுள்ளதாக கூறப்படுகிறது. விரைவில் ஆர்.ஆர்.ஆர் படத்தின் புதிய ரிலீஸ் தேதி அறிவிக்கப்படும் என எதிர்பார்க்கப்படுகிறது.