தமிழ் சினிமாவில் பல்வேறு வெற்றி திரைப்படங்களை தயாரித்த பைவ் ஸ்டார் கதிரேசன் இயக்குனராக அறிமுகமாகும் படம் “ருத்ரன்”. இந்த திரைப்படத்தில் ராகவாலாரன்ஸ் கதாநாயகனாக நடிக்கிறார். அத்துடன் சரத்குமார், பிரியா பவானி சங்கர், பூர்ணிமா பாக்யராஜ் உட்பட பலர் முக்கியமான கதாபாத்திரங்களில் நடிக்கின்றனர். ஜி.வி.பிரகாஷ் இசை அமைக்கும் இந்த படத்திற்கு ஆர்.டி.ராஜசேகர் ஒளிப்பதிவு செய்கிறார். தமிழ், தெலுங்கு, கன்னடம், மலையாளம் ஆகிய மொழிகளில் இத்திரைப்படம் வெளியாக இருக்கிறது. அண்மையில் வெளியாகிய ருத்ரன் படத்தின் பர்ஸ்ட் லுக் மற்றும் 2ம் லுக் போஸ்டர்கள் அனைவரின் கவனத்தையும் ஈர்த்தது.
இந்த படம் வரும் டிசம்பர் மாதம் 23ஆம் தேதி வெளியாக இருப்பதாக அறிவிக்கப்பட்டு இருந்தது. இந்த நிலையில் இப்படத்தின் ரிலீஸ் தேதியை மாற்றி இருப்பதாக படக்குழு அறிக்கை ஒன்றை வெளியிட்டு உள்ளது. அவற்றில் “எங்கள் நிறுவனத்தின் வெற்றிப் படைப்புகளான பொல்லாதவன், ஆடுகளம், ஜிகர்தண்டா, டைரி வெற்றிப்பட வரிசையில் அடுத்து வருவது ராகவா லாரன்ஸ் நடிப்பில் உருவாகிவரும் “ருத்ரன்” திரைப்படம் என்பதில் பெருமிதம்கொள்கிறோம். காஞ்சனா படம் வெளியாகி 3 வருடங்களுக்கு பின் வெளியாகும் திரைப்படம் “ருத்ரன்” என்பதால், ராகவா லாரன்ஸ் அவர்களின் ரசிகர்கள் மற்றும் மக்களின் எதிர்பார்ப்புகளை முழுதிருப்திப்படுத்தும் வகையில் படத்தின் நிறைவு பணிகள் நடந்து வருகிறது.
இத்திரைப்படம் கிறிஸ்துமஸ் தினத்தில் வெளியிட முன்பே அறிவிக்கபட்டிருந்த நிலையில், படத்தின் கிராபிக்ஸ் பணிகள் நிறைவடைய சில மாதங்கள் தேவைப்படுவதால் ராகவா லாரன்ஸ் அவர்களின் நடிப்பில் மாபெரும் வெற்றி கண்ட காஞ்சனா படம் வெளியான ஏப்ரல் மாதத்தில் 14/4/2023 அன்று தமிழ், தெலுங்கு, கன்னடம், மலையாளம் போன்ற மொழிகளில் “ருத்ரன்” வெளியாகும் என்பதை தெரிவித்துக்கொள்கிறோம். இறைவனின் அருளுடனும், ரசிகர்கள் மற்றும் மக்கள் ஊடகங்கள் ஆதரவுடன் “ருத்ரன்” ஏப்ரல் மாதம் வெற்றி வாகை சூட வாழ்த்துமாறு வேண்டிக்கொள்கிறேன்” என்று தெரிவிக்கப்பட்டுள்ளது.