பாபநாசம் 2 படத்தில் நடிகர் கமல்ஹாசனுக்கு ஜோடியாக நதியா நடிக்க இருப்பதாக தகவல் வெளியாகியுள்ளது.
மலையாளத் திரையுலகில் ஜீத்து ஜோசப் இயக்கத்தில் மோகன்லால், மீனா நடிப்பில் கடந்த 2013-ஆம் ஆண்டு வெளியாகி சூப்பர் ஹிட் அடித்த திரைப்படம் திரிஷ்யம். இந்த படம் தமிழில் கமல்ஹாசன், கவுதமி நடிப்பில் பாபநாசம் என்ற பெயரில் ரீமேக் செய்யப்பட்டு வெளியாகியிருந்தது. மேலும் இந்த படம் இந்தி, தெலுங்கு, கன்னடம் உள்ளிட்ட பல மொழிகளில் ரீமேக் செய்யப்பட்டு வெளியாகி வெற்றி பெற்றது. சமீபத்தில் மோகன்லால், மீனா நடிப்பில் திரிஷ்யம் 2 திரைப்படம் வெளியாகி ரசிகர்களிடையே நல்ல வரவேற்பை பெற்றது. இதைத் தொடர்ந்து ஹிந்தி, தெலுங்கு, உள்ளிட்ட மொழிகளில் திரிஷ்யம் இரண்டாம் பாகம் உருவாக இருப்பதாக அறிவிப்புகள் வெளியானது .
தற்போது தமிழிலும் பாபநாசம் 2 உருவாக இருக்கிறது. ஆனால் பாபநாசம் முதல் பாகத்தில் கமலுக்கு ஜோடியாக நடித்த கௌதமி இரண்டாம் பாகத்தில் நடிக்க மாட்டார் என்று கூறப்படுகிறது. இந்நிலையில் கௌதமிக்கு பதிலாக நடிகை நதியாவை நடிக்க வைக்க பேச்சுவார்த்தை நடைபெற்று வருவதாக தகவல் வெளியாகியுள்ளது. இதுவரை கமல்ஹாசன், நதியா இருவரும் எந்த ஒரு படத்திலும் இணைந்து நடித்ததில்லை என்பது குறிப்பிடத்தக்கது.