நடிகர் ஜிவி பிரகாஷ் இசை அமைத்துள்ள புதிய ஆல்பம் குறித்த தகவல் வெளியாகியுள்ளது.
தமிழ் சினிமாவில் திரைப்பட பாடல்களை தாண்டி தனி ஆல்பங்களும் சமூக வலைதளங்களில் வெளியிடப்படுகிறது. இதில் இசையமைப்பாளர் ஏ.ஆர் ரகுமான் முதல் பல்வேறு இசை அமைப்பாளர்களும் தனி ஆல்பங்களை தயார் செய்து வெளியிடுகின்றனர். இந்த ஆல்பம் பாடல்களுக்கு ரசிகர்கள் மத்தியில் நல்ல வரவேற்பும் இருக்கிறது. இந்நிலையில் நடிகரும் இசை அமைப்பாளருமான ஜி.வி பிரகாஷ் குரலில் வாடி என் செல்ல குட்டி என்ற ஆல்பம் பாடல் உருவாகியுள்ளது.
இந்த பாடலை மைக் செட் ஸ்ரீராம் வெளியிட்டுள்ளார். இவர்களது கூட்டணியில் ஏற்கனவே உருவான ஹேய் சிங்கரி என்ற பாடல் மிகப்பெரிய ஹிட்டடித்தது. இந்நிலையில் தற்போது உருவாகியிருக்கும் வாடி என் செல்ல குட்டி என்ற பாடலும் நல்ல வரவேற்பை பெறும் என எதிர்பார்க்கப்படுகிறது. இந்த பாடல் வெளியீட்டு விழாவில் மீனா சாப்ரியா, நடிகர் விக்னேஷ் காந்த், கதிர், ராகுல் உள்ளிட்ட பலர் கலந்து கொண்டனர்.