10 சதவீதம் இட ஒதுக்கீடு தொடர்பாக சென்னை கலைவாணர் அரங்கில் முதல்வர் ஸ்டாலின் தலைமையில் அனைத்துக் கட்சிக் கூட்டம் இன்று நடைபெற்றது. இந்த கூட்டத்தில் பேசிய முதல்வர் ஸ்டாலின், இட ஒதுக்கீட்டால் தகுதி தகுதி போனது திறமை போனது என்று சொல்லி வந்த சிலர் இந்த 10 சதவீத இட ஒதுக்கீட்டை மட்டுமே ஆதரிக்கிறார்கள். நூற்றாண்டு காலமாக போற்றி பாதுகாத்து வந்த சமூக நீதிக் கொள்கைக்கு பேராபத்து தற்போது ஏற்பட்டுள்ளது.
ஜாதியினால் அடக்கி ஒடுக்கப்பட்ட மக்களுக்கு கல்வி மற்றும் வேலை வாய்ப்பை கொடுப்பதுதான் சமூக நீதி. இட ஒதுக்கீட்டில் பொருளாதார அளவுகோலை சேர்க்கக்கூடாது என்று ஜவஹர்லால் நேரு காலத்தில் பேசப்பட்டது. ஏழைகளுக்கான எந்த திட்டத்தையும் திமுக அரசு எப்போதும் தடுக்காது. ஏழை மக்களின் வறுமையை போக்க மத்திய அரசு கொண்டுவரும் எந்த திட்டத்தையும் திமுக அரசு ஆதரிக்கும். மாதம்தோறும் 60 ஆயிரம் ரூபாய் பெறுபவர்கள் ஏழைகளா? முன்னேறிய சமூகத்தை சேர்ந்த ஏழைகளுக்கான இட ஒதுக்கீடு அல்ல இது என கடுமையாக ஸ்டாலின் விமர்சித்துள்ளார்.