தமிழ் திரைப்பட இயக்குனர் எஸ்.பி.ஜனநாதன் உடல்நலக்குறைவு காரணமாக சற்று முன் காலமானார்.
தமிழ் சினிமாவில் புரட்சிகரமான கருத்துக்களை உடைய மாறுபட்ட படங்களை இயக்கியவர் இயக்குனர் எஸ்.பி.ஜனநாதன். அவருக்கு வயது 61. அவர் முதலில் இயக்கிய இயற்கை என்ற திரைப் படத்திற்கு தேசிய விருது கிடைத்தது. அதனைத் தொடர்ந்து ஈ, பேராண்மை, புறம்போக்கு என்கிற பொதுவுடமை ஆகிய படங்களை இயக்கியுள்ளார். அவர் இயக்கத்தில் விஜய் சேதுபதி, ஸ்ருதிஹாசன் நடிப்பில் லாபம் படம் உருவாகியுள்ளது. இந்த திரைப்படத்தின் படப்பிடிப்பு முடிந்து இறுதிகட்டப் பணிகள் தீவிரமாக நடந்து கொண்டிருக்கின்றன.
ஆனால் இந்தப் படத்தின் இறுதிக்கட்ட பணிகளில் இயக்குனருக்கு உடல்நலக்குறைவு ஏற்பட்டது. இதனையடுத்து அவர் உடனடியாக அப்பல்லோ மருத்துவமனையில் சிகிச்சைக்காக அனுமதிக்கப்பட்டார். அங்கு தீவிர சிகிச்சை பிரிவில் அனுமதிக்கப்பட்டு, தீவிர சிகிச்சை அளிக்கப்பட்டு வந்தது. இந்நிலையில் சிகிச்சை பலனின்றி அவர் சற்று முன் பரிதாபமாக உயிரிழந்தார். அவரின் மறைவுக்கு திரைப் பிரபலங்கள் அனைவரும் இரங்கல் தெரிவித்து வருகிறார்கள்.