தமிழகத்தில் சட்டமன்ற உறுப்பினராகவும், தமிழ் சினிமாவில் தயாரிப்பாளர் மற்றும் நடிகராக கலக்கி வரும் உதயநிதி ஸ்டாலின் ஒரு பக்கம் சினிமா, மறுபக்கம் அரசியல் என பயங்கர பிஸியாக இருந்து வருகிறார். அந்த வகையில் தற்போது மாரி செல்வராஜ் இயக்கத்தில் உதயநிதி ஸ்டாலின் “மாமன்னன்” என்ற படத்தில் நடிக்கிறார். இந்த படத்தில் வைகைப்புயல் வடிவேலு முதன்முதலாக உதயநிதியுடன் இணைந்து நடிக்கிறார். அதோடு மட்டுமில்லாமல் “மகிழ்திருமேனி” என்ற படத்திலும் உதயநிதி ஸ்டாலின் நடிக்க உள்ளதாக தகவல் வெளியாகியுள்ளது. இதற்கு முன்னதாக உதயநிதி காதல் கலந்த காமெடி படங்களில் அதிகமாக நடித்து வந்தார். பின்னர் “மனிதன்” படத்திற்கு பிறகு உதயநிதி தன்னுடைய வழியை மாற்றி அமைத்துக் கொண்டார்.
அதன்படி, மனிதன் படத்தில் தனது சிறந்த நடிப்பை வெளிப்படுத்திய உதயநிதி சைக்கோ, நிமிர், கண்ணே கலைமானே உள்ளிட்ட பல வித்தியாசமான படங்களில் நடித்து ரசிகர்களின் உள்ளத்தை கவர்ந்தார். இவர் தற்போது அருண் ராஜா காமராஜ் இயக்கத்தில் “நெஞ்சுக்கு நீதி” என்ற படத்தில் நடித்துள்ளார். இந்த திரைப்படம் விரைவில் திரைக்கு வரவுள்ளது. இந்த நிலையில் தற்போது உதயநிதியின் ரெட் ஜெயண்ட் தயாரிப்பு நிறுவனம் பல படங்களின் உரிமையை பெற்று அதனை வெளியிட்டு வருகிறது. அந்த வகையில் விஜய்யின் பீஸ்ட், ரஜினியின் அண்ணாத்த, அஜித்தின் வலிமை உள்ளிட்ட படங்களின் தமிழ்நாடு திரையரங்க உரிமையை இந்த நிறுவனம் பெற்றுள்ளது. அதனை தொடர்ந்து ரெட் ஜெயண்ட் நிறுவனம் தற்போது சிவகார்த்திகேயனின் “டான்” படத்தின் தமிழ்நாடு விநியோகஸ்த உரிமையை பெற்றுள்ளது. இந்த தகவலை தனது டுவிட்டர் பக்கத்தில் ரெட் ஜெயண்ட் நிறுவனம் அதிகாரபூர்வமாக அறிவித்துள்ளது.