தமிழ் சினிமாவில் முன்னணி நடிகையாக வலம் வந்து கொண்டிருக்கும் நயன்தாரா கடந்த ஜூன் மாதம் இயக்குனர் விக்னேஷ் சிவனை திருமணம் செய்து கொண்டார். திருமணம் முடிந்த கையோடு ஹனிமூன் சென்று இருந்த இவர்கள் அவ்வப்போது தங்கள் புகைப்படங்களை இணையத்தில் பகிர்ந்து வந்தனர். இதனிடையே கடந்த சில நாட்களுக்கு முன்பு தங்களுக்கு இரட்டை குழந்தை பிறந்திருப்பதாக இவர்கள் திடீரென அறிவித்தது ரசிகர்கள் மத்தியில் அதிர்ச்சியை ஏற்படுத்தியது. அதன் பிறகு வாடகை தாய் மூலமாக குழந்தை பெற்றுக் கொண்டதாக தெரிவித்தனர்.
இது பல சர்ச்சைகளைக் கிளப்பிய நிலையில் தமிழக அரசு முறைப்படி விசாரணை நடத்தி வருகின்றது. இந்நிலையில் நயன்தாரா மற்றும் விக்னேஷ் சிவன் தம்பதியருக்கு 2016ஆம் ஆண்டு மார்ச் 11-ஆம் தேதி பதிவு திருமணம் நடைபெற்றுள்ளது. அவர்களின் திருமண பதிவு சான்றிதழ் உண்மை தன்மை பதிவு துறையால் உறுதி செய்யப்பட்டுள்ளது. இதன் மூலம் அவர்களின் குழந்தைப்பேறு விவகாரம் முடிவுக்கு வந்துள்ளது.