தமிழ், தெலுங்கு உள்ளிட்ட மொழிகளில் 150க்கும் அதிகமான திரைப்படங்களில் நடித்து கதாநாயகியாக வலம் வந்தவர் ரோஜா. இதையடுத்து இவர் குணசித்திர நடிகையாகவும், தொலைக்காட்சி நிகழ்ச்சிகளில் நடுவராகவும் கலந்துகொண்டு இருக்கிறார். இப்போது ஆந்திர சுற்றுலாத் துறை மந்திரியாக இருக்கும் ரோஜா, பதவியேற்றதும் நடிப்புக்கு முழுக்குபோட்டு ஒதுங்கினார். தற்போது ரோஜா தன் மகள் அன்ஷு மாலிகாவை கதாநாயகியாக அறிமுகம்செய்யும் முயற்சிகளில் ஈடுபட்டு வருகிறார். இதற்கிடையில் தன் மகள் அன்ஷு மாலிகாவை நடிகையாக்க தானே நடிப்பு பயிற்சி அளித்து வருவதாக கூறப்படுகிறது.
அத்துடன் ரோஜாவின் கணவர் மற்றும் இயக்குனருமான செல்வமணி அன்ஷுமாலிகாவுக்கு நடிப்பு பயிற்சியளித்து வருவதாக தகவல் வெளியாகியிருக்கிறது. முன்பே தமிழ், தெலுங்கு தயாரிப்பாளர்கள் அன்ஷுவை கதாநாயகியாக நடிக்க வைக்க தன்னை அணுகியதாக ரோஜா தெரிவித்திருந்தார். இந்நிலையில் தற்போது அமெரிக்காவிலுள்ள பிரபல திரைப்பட கல்லூரியில் படிக்க அன்ஷு மாலிகாவுக்கு இடம் கிடைத்து இருப்பதாகவும், அங்கு சென்று நடிப்பு, இயக்குனர், திரைக்கதை எழுதுதல் ஆகிய பயிற்சிகளை எடுக்க உள்ளதாகவும் தகவல் வெளியாகி இருக்கிறது. ஆகவே படிப்பை முடித்து நாடு திரும்பியதும் அன்ஷு கதாநாயகியாக அறிமுகமாக இருப்பதாக சினிமா வட்டாரங்கள் தெரிவிக்கிறது.