நடிகர் விவேக் மாரடைப்பு காரணமாக நேற்று சென்னையில் உள்ள தனியார் மருத்துவமனை ஒன்றில் சிகிச்சைக்காக அனுமதிக்கப்பட்டார். அங்கு தீவிர சிகிச்சை பிரிவில் அனுமதிக்கப்பட்டு அவருக்கு மருத்துவர்கள் சிகிச்சை அளித்தனர். வடபழனியில் உள்ள தனியார் மருத்துவமனையில் தீவிர சிகிச்சை பிரிவில் சிகிச்சை பெற்றுவந்த அவருக்கு எக்மோ கருவி மூலம் மருத்துவர்கள் சிகிச்சை அளித்து வந்தனர். சிகிச்சை பலனின்றி நடிகர் விவேக் இன்று அதிகாலை காலமானார்.
அவரின் உடல் இல்லத்தில் வைக்கப்பட்டது. இவர் சுற்றுச்சூழல் ஆர்வலர் ஆக விளங்கியவர். இவர் இறுதியாக 2020 ஆம் ஆண்டு தாராள பிரபு என்ற படத்தில் நடித்துள்ளார். மேலும் சிறந்த நடிகருக்கான பத்ம ஸ்ரீ உள்ளிட்ட பல்வேறு விருதுகளையும் பெற்றுள்ளார். இவரது மறைவுக்கு பலரும் இரங்கல் தெரிவித்து வருகிறார்கள்.
சென்னை விருகம்பாக்கம் இல்லத்திலிருந்து நடிகர் விவேக்கின் இறுதி ஊர்வலம் தொடங்கியது. அதில் ரசிகர்கள் மற்றும் பொதுமக்கள் உள்ளிட்ட ஏராளமானோர் பங்கேற்றனர். கையில் மரக்கன்றுகளை ஏந்தி ரசிகர்கள் விவேக்கின் இறுதி ஊர்வலத்தில் பங்கேற்பு. காவல்துறை மரியாதையுடன் ஊர்வலம் தொடங்கியது. இதனையடுத்து அவரது உடல் 78 குண்டுகள் முழங்க காவல்துறை மரியாதையுடன் தகனம் செய்யப்பட்டது.
இந்நிலையில் நடிகர் விவேக்கின் நிறைவேறாத ஆசை இயக்குனர் ஆக வேண்டும் என்பதுதான். அவர் நடிகர் என்பது மட்டும் தான் பலருக்கும் தெரியும். ஆனால் காதல் மன்னன் படத்தில் உதவி இயக்குனராக பணியாற்றிய விவேக், விஜயகாந்தை வைத்து படம் இயக்க கதையை ரெடி செய்தும் அதை பண்ண முடியாமல் போய்விட்டது. விஜய் ஆண்டனியை வைத்து படம் பண்ண, சத்யஜோதி பிலிம்ஸ் நிறுவனத்திடம் கடந்த சில நாட்களாக பேச்சுவார்த்தையில் ஈடுபட்டு இருந்தார்.