காங்கிரஸ் முன்னாள் தலைவர் ராகுல் காந்தி, இந்திய ஒற்றுமை பயணத்தை கன்னியாகுமரியில் தொடங்கினார். காஷ்மீர் வரை 150 நாட்களில் 3,500 கிலோ மீட்டர் தூரம் பாத யாத்திரை மேற்கொள்கிறார். இந்த சுற்றுப்பயணத்திற்கு பல்வேறு அரசியல் கட்சிகளின் தலைவர்கள் வரவேற்பும் வாழ்த்தும் தெரிவித்துள்ளனர். அதேசமயம், ஆளுங்கட்சியான பாஜக, ராகுல் காந்தியின் பயணத்தை தொடர்ந்து விமர்சித்து வருகிறது.
அவ்வகையில் பாஜக தனது டுவிட்டர் பக்கத்தில் இரண்டு புகைப்படங்களை பதிவிட்டு விமர்சித்துள்ளது. ஒன்று ராகுல் காந்தியின் புகைப்படம். மற்றொன்று அவர் அணிந்திருந்ததுபோன்ற ஒரு டி-ஷர்ட்டின் விலையை குறிக்கும் படம். அந்த படத்தில் பர்பரி டி-ஷர்ட்டின் விலை ரூ.41.257 என தெரிவிக்கப்பட்டிருந்தது. இந்த பதிவு வைரலாகி வருகிறது.
இந்நிலையில் பாதயாத்திரையின் போது ராகுல் காந்தி அணிந்திருந்த டி ஷர்ட் திருப்பூரில் வாங்கியது என காங்கிரஸ் தலைவர் கே எஸ் அழகிரி கூறியுள்ளார். ராகுல் காந்தியின் டீச்சர் 40 ஆயிரத்திற்கு மேல் விலை கொடுத்து வாங்கப்பட்டதாக பாஜகவினர் கூறி வருவதற்கு பதிலளித்த அவர், பாதயாத்திரையில் கலந்து கொள்ளும் 20000 பேருக்கு காங்கிரஸ் சார்பில் டீ சர்ட் அடிக்க திருப்பூரில் கொடுத்தோம். அதில் இரண்டு டீ சர்ட் ராகுலுக்கு அடித்தோம். அவ்வளவுதான், பாஜகவினர் தேவையில்லாத வதந்திகளை பரப்புகின்றனர் என்று குற்றம் சாட்டியுள்ளார்.