தென் ஆப்பிரிக்காவில் சென்ற வருடம் இறுதியில் கண்டறியப்பட்ட ஒமிக்ரான் எனும் உருமாற்றம் அடைந்த கொரோனா தொற்று தொடர்ந்து மரபணு மாற்றமடைந்து வருகிறது. அந்த அடிப்படையில் இப்போது பல நாடுகளில் ஒமிக்ரான் எக்ஸ்.இ. என்ற புதியவகை வைரஸ் பரவிவருகிறது. இந்த நிலையில் தென்ஆப்பிரிக்காவில் மரபணுமாற்றமடைந்த 2 புதிய ஒமிக்ரான் வகைகள் கண்டறியப்பட்டு இருப்பதாக விஞ்ஞானிகள் தெரிவித்துள்ளனர்.
இது தொடர்பாக அந்நாட்டு தொற்றுநோய் தடுப்பு மையத்தின் இயக்குனர் துலியோ டி ஒலிவேரா கூறியதாவது “தென் ஆப்பிரிக்காவில் புதியவகை ஒமிக்ரான் வைரஸ்கள் கண்டறியப்பட்டு இருக்கிறது. அதற்கு பிஏ.4 மற்றும் பிஏ.5 என பெயரிடப்பட்டுள்ளது. இந்த புதியவகை வைரஸ்கள் தென் ஆப்பிரிக்காவில் தொற்று நோய்களின் அதிகரிப்பை ஏற்படுத்தவில்லை. எனினும் அவை பல்வேறு நாடுகளின் மாதிரிகளில் கண்டறியப்பட்டு இருக்கிறது. அதன்படி போட்ஸ் வானா, பெல்ஜியம், ஜெர்மனி, டென்மார்க், இங்கிலாந்து போன்ற நாடுகளில் இந்த புதிய வகை வைரஸ்கள் கண்டறியப்பட்டுள்ளது” என்று கூறினார் .