திண்டுக்கல் மாவட்டத்தில் விவசாயமானது பிரதான தொழிலாக இருந்து வருகிறது. இதனால் அணைகள், குளங்கள், ஆறுகள், திறந்தவெளி கிணறுகள், ஆழ்துளை கிணறுகள் போன்றவை வாயிலாக பாசனம் செய்யப்படுகிறது. ஆகவே மழை நீரை சேமித்து, நிலத்தடி நீர்மட்டத்தை உயர்த்தும் முயற்சியில் மாவட்ட நிர்வாகமானது ஈடுபட்டு வருகிறது. அந்த வகையில் ஊரக வளர்ச்சி முகமை வாயிலாக சென்ற வருடம் 21 நாட்களில் 605 மழைநீர் சேமிப்பு கட்டமைப்புகள் உருவாக்கப்பட்டு உலக சாதனை நிகழ்த்தப்பட்டது. இதையடுத்து மழைக் காலத்தில் வீணாக ஓடும் மழைநீரை, பூமிக்குள் சேமிக்க திட்டமிடப்பட்டது.
இதற்கென ஊரக வளர்ச்சி முகமை வாயிலாக நீரோடைகள், மழைநீர் தேங்கும் இடங்களில் 2 ஆயிரத்து 50 நிலத்தடி நீருட்டல் உறை கிணறுகளை 7 தினங்களில் அமைக்கும் பணியானது கடந்த 11-ஆம் தேதி துவங்கி 17-ம் தேதி முடிந்தது. அதில் ஒவ்வொரு உறை கிணற்றிலும் 8 மணிநேரத்தில் 1,000 லிட்டர் மழைநீரை சேமிக்கலாம். அந்த அடிப்படையில் 2 ஆயிரத்து 50 உறை கிணறுகளிலும் ஓராண்டில் 16 கோடி லிட்டர் முதல் 30 கோடி லிட்டர் வரை மழை நீரை சேமிக்க முடியும். இதன் காரணமாக நிலத்தடி நீர்மட்டம் உயர்ந்து விவசாயம், குடிநீர் தேவை பூர்த்தியாகும்.
இதனிடையில் 7 நாட்களில் உறை கிணறுகள் அமைக்கப்பட்டதை எலைட் வேர்ல்ட் ரெக்கார்ட்ஸ், ஏசியன் ரெக்கார்ட்ஸ் அகாடமி, இந்தியா ரெக்கார்ட்ஸ் அகாடமி, தமிழன் புக் ஆப் ரெக்கார்ட்ஸ் போன்ற நிறுவனங்களின் அதிகாரிகள் ஆய்வு மேற்கொண்டு உலக சாதனையாக அங்கீகரித்தனர். இந்த உலகசாதனைக்கான சான்றிதழை மாவட்ட கலெக்டர் விசாகனிடம், அந்நிறுவனங்களின் அதிகாரிகள் வழங்கினர். இந்நிகழ்ச்சியில் கூடுதல் கலெக்டர் தினேஷ் குமார், பேரூராட்சிகள் உதவி இயக்குனர் மனோரஞ்சிதம், ஊராட்சிகள் உதவி இயக்குநர் ரெங்கராஜன், கலெக்டரின் நேர்முக உதவியாளர் (வளர்ச்சி) ராணி, ஊரக வளர்ச்சி முகமை செயற்பொறியாளர் அனுராதா உள்ளிட்ட அதிகாரிகள் பங்கேற்றனர்.