தமிழகத்தில் உள்ள பள்ளிகளில், நடப்பு கல்வியாண்டில் 1 முதல் 3-ஆம் வகுப்பு வரையிலான மாணவர்களுக்கு எண்ணும் -எழுத்தும் என்ற திட்டம் நடைமுறைப்படுத்தப்பட உள்ளது. மேலும் இத்திட்டம் குறித்து தமிழக அரசு வெளியிட்டுள்ள செய்திக்குறிப்பில், ‘குழந்தைகளுக்கு அவர்களின் தனித்திறனைக் கண்டறிய உதவும் வகையில், கல்வியின் குறிக்கோள் அமைய வேண்டும். எனவே, குழந்தைகள் தங்கள் படைப்புத்திறனை, ஆற்றலை உணரும் வகையில் பேசுதல், செயல்பாடுகள், கலை, கைவினைச் செயல்பாடுகள், எழுதுதல், வெளிப்பாடு போன்றவற்றின் மூலம் குழந்தைகளை ஊக்குவிக்கும் வகையிலான ஒரு திட்டமே இன்றைய தேவை. பாடல், கதை, வாசித்தல், பொம்மலாட்டம், படைப்பு மற்றும் பல செயல்பாடுகளை அடிப்படையாகக் கொண்ட புதிய கற்பித்தல் முறை தேவையாய் இருக்கிறது.
இந்நிலையில் கொரோனா பரவலின் காரணமாக, 2 ஆண்டுகளாக பள்ளிக்குச் செல்லாத குழந்தைகளுக்கு, கற்றல் இடைவெளி ஏற்பட்டிருக்கிறது. அதாவது 2020-ஆம் ஆண்டு, 1-ஆம் வகுப்பில் சேர்ந்த குழந்தையானது, 2021-இல், 2-ஆம் வகுப்பு படிக்காமலே, 2022-ஆம் ஆண்டிற்குள், நேரடியாக 3-ஆம் வகுப்புக்குள் நுழைகிறது. இந்த சூழலில், இவ்வாறு ஏற்பட்டிருக்கும் கற்றல் இழப்பை குறைக்க பள்ளி வகுப்பறையில் செய்ய வேண்டியுள்ளது.
மேலும் இணையவழி வகுப்புகள் நடைபெற்றாலும், இணையம் மெதுவாக வேலை செய்யும், கிராமங்களில் பாடங்களை கவனிப்பதில் சிக்கல்கள் ஏற்பட்டன. மேலும் ஸ்மார்ட் போன்கள் வசதி இல்லாத குடும்பங்களும் இருந்தன. எனவே அந்தக் குடும்பங்களிலுள்ள குழந்தைகளுக்கு ஏற்பட்டிருக்கும் கற்றல் இழப்பானது மற்ற குழந்தைகளைவிட அதிகம். இந்நிலையில் இந்தத் தேவைகளை கருத்தில் கொண்டு, வருகின்ற கல்வியாண்டில், 1 முதல் 3-ஆம் வகுப்புகளுக்காக ‘எண்ணும் எழுத்தும்’ என்ற திட்டமானது வடிவமைக்கப்பட்டு நடைமுறைக்கு வருகிறது.
எனவே வரும் 2022-23 கல்வியாண்டில் தொடங்கப்படவிருக்கும், இத்திட்டத்தின் முக்கிய இலக்கு, 2025-ல் 8 வயதுக்குட்பட்ட அனைத்துக் குழந்தைகளுக்கும், எழுத்தறிவு மற்றும் எண்ணறிவு கிடைத்துவிட வேண்டும் என்பதாகும். இந்நிலையில் கல்வியில் ஒரு மறுமலர்ச்சியை ஏற்படுத்தவுள்ள இந்த ‘எண்ணும் எழுத்தும்’ என்ற திட்டமானது, தமிழ்நாடு அரசின் பள்ளிக் கல்வியில் ஒரு வரலாற்று முக்கியத்துவம் வாய்ந்த திட்டம்’ என தமிழக அரசு தெரிவித்துள்ளது.