இங்கிலாந்து அணி 20 ரன்கள் வித்தியாசத்தில் நியூசிலாந்து அணியை வீழ்த்தி வெற்றி பெற்றது.
ஆஸ்திரேலியாவில் டி20 உலக கோப்பை கிரிக்கெட் தொடர் விறுவிறுப்பாக நடைபெற்று வருகிறது. தற்போது சூப்பர் 12 சுற்று போட்டிகள் நடைபெற்று வருகிறது. இதில் குரூப்-1 பிரிவில் 6 அணிகள் மற்றும் குரூப் 2 பிரிவில் 6 அணிகள் என மொத்தம் 12 அணிகள் விளையாடி வருகின்றன. இதில் டாப் இரண்டு இடங்களை பிடிக்கும் அணிகள் அரை இறுதிக்குள் நுழையும். இந்நிலையில் இன்று குரூப் 1 பிரிவிலுள்ள இங்கிலாந்து மற்றும் நியூசிலாந்து அணிகள் பிரிஸ்பேன் மைதானத்தில் மோதியது.
இதில் டாஸ் வென்ற இங்கிலாந்து அணி முதலில் பேட்டிங் ஆடி 20 ஓவர் முடிவில் 6 விக்கெட்டுகளை இழந்து 179 ரன்கள் குவித்தது. அதிகபட்சமாக ஜாஸ் பட்லர் 47 பந்துகளில் (7 பவுண்டரி, 2 சிக்ஸர்) 73 ரன்களும், அலெக்ஸ் ஹேல்ஸ் 40 பந்துகளில் 7 பவுண்டரி, ஒரு சிக்ஸர் உட்பட 52 ரன்களும் எடுத்தனர். நியூசிலாந்து அணியில் லாக்கி பெர்குசன் 2 விக்கெட்டுகளும், டிம் சவுதி, சான்ட்னர், இஷ் சொதி ஆகியோர் தலா ஒரு விக்கெட் எடுத்தனர்..
இதையடுத்து ஆடிய நியூசிலாந்து அணி 20 ஓவர் முடிவில் 6 விக்கெட்டுகளை இழந்து 159 ரன்கள் மட்டுமே எடுத்தது. இதனால் 20 ரன்கள் வித்தியாசத்தில் இங்கிலாந்து அணி வெற்றி பெற்றது. நியூசிலாந்து அணியில் அதிகபட்சமாக பிலிப்ஸ் 36 பந்துகளில் 4 பவுண்டரி 3 சிக்சர் உட்பட 62 ரன்கள் எடுத்தார். மேலும் கேன் வில்லியம்சன் 40 பந்துகளில் 40 ரன்கள் அடித்தார். இங்கிலாந்து அணியில் அதிகபட்சமாக கிறிஸ் வோக்ஸ் மற்றும் சான் கரன் தலா 2 விக்கெட்டுகளும் மார்க் வுட், பென் ஸ்டோக்ஸ் தலா ஒரு விக்கெட் எடுத்தனர்.