பிரதமர் மோடி தலைமையில் மத்திய மந்திரி சபை கூட்டம் நடைபெற்றது அதில் எடுக்கப்பட்ட முடிவுகள் குறித்து மத்திய மந்திரி அனுராக் தாகூர் செய்தியாளர்களிடம் கூறியது, நாடு முழுவதும் கேந்திரிய வித்யாலயாக்கள், நவோதயா வித்யாலயாக்கள் உள்ளிட்ட 14 ஆயிரத்துக்கு மேற்பட்ட பள்ளிகள், ‘பிரதமர்-ஸ்ரீ’ பள்ளிகளாக உருவெடுக்க தரம் உயர்த்தப்படும். அதற்கு மத்திய மந்திரிசபை ஒப்புதல் அளித்துள்ளது. மத்திய, மாநில அரசுகள் மற்றும் உள்ளாட்சி அமைப்புகள் நிர்வகிக்கும் பள்ளிகள் இதில் சேர்க்கப்படும். இதற்கான மொத்த செலவு 5 ஆண்டுகளுக்கு ரூ.27,360 கோடி ஆகும்.
அதனைத்தொடர்ந்து மத்திய அரசின் பங்கு ரூ.18, 128 கோடி. இந்த திட்டத்தின் மூலம் 1 கோடியே 87 லட்சம் மாணவர்கள் பலன் அடைவார்கள். ரெயில்வே நிலத்தை ‘பிரதமரின் கதிசக்தி’ திட்டத்துக்காக நீண்டகால குத்தகைக்கு விடும் கொள்கைக்கு மத்திய மந்திரிசபை ஒப்புதல் அளித்தது. தற்போதைய 5 ஆண்டுகளுக்கு பதிலாக 35 ஆண்டுகளுக்கு குத்தகைக்கு விடப்படும். அந்த நிலங்களில் 300 சரக்கு முனையங்கள் அமைக்கப்படும். இதன்மூலம் 1 லட்சத்து 25 ஆயிரம் வேலைவாய்ப்புகள் உருவாகும். இதனையடுத்து கேரள மாநிலம் கொச்சியில் 2 ஆம் கட்ட மெட்ரோ ரெயில் திட்டத்துக்கு மத்திய மந்திரிசபை ஒப்புதல் அளித்தது. மேலும் 11 கி.மீ. தூரத்துக்கு ரூ.1,957 கோடி செலவில் இத்திட்டம் மேற்கொள்ளப்படும். இந்த வழித்தடத்தில் 11 ரெயில் நிலையங்கள் அமைக்கப்படும் என்று அவர் தெரிவித்துள்ளார்.