இளம்பெண் மர்மமான முறையில் இறந்த சம்பவம் குறித்து போலீசார் விசாரணை மேற்கொண்டு வருகின்றனர்.
திருவள்ளூர் மாவட்டத்தில் உள்ள புதிய எருமைவெட்டி பாளையம் பகுதியில் பாபு என்பவர் வசித்து வருகிறார். இவர் தனியார் பேருந்தில் ஓட்டுநராக வேலை பார்த்து வருகிறார். இவருக்கு அமுதா(30) என்ற மனைவி இருந்துள்ளார். இந்த தமதியினருக்கு ஒரு மகளும், ஒரு மகனும் இருக்கின்றனர். அதே பகுதியில் வசிக்கும் தனியார் நிறுவன ஊழியரான ஜோதீஸ்வரன் என்பவருடன் அமுதாவுக்கு பழக்கம் ஏற்பட்டு அது கள்ளக்காதலாக மாறியது. இதனை அறிந்த பாபு தனது மனைவியை கண்டித்துள்ளார். இதனால் கடந்த சில மாதங்களுக்கு முன்பு அமுதா ஜோதிஸ்வரனுடன் ஓட்டம் பிடித்துள்ளார்.
இதனால் பாபு தனது மனைவியை பல்வேறு இடங்களில் தேடி பார்த்துள்ளார். இந்நிலையில் கள்ளக்காதல் ஜோடி பெரியகுப்பம் கம்பர் தெருவில் இருக்கும் ஒரு வீட்டில் கணவன் மனைவி போல சேர்ந்து வாழ்ந்து வந்துள்ளனர். கடந்த சில நாட்களாக பூட்டி கிடந்த வீட்டிற்குள் இருந்து துர்நாற்றம் வீசியதால் அக்கம் பக்கத்தினர் போலீசருக்கு தகவல் தெரிவித்தனர். அந்த தகவலின் படி சம்பவ இடத்திற்கு விரைந்து சென்ற போலீசார் கதவை உடைத்து உள்ளே சென்று பார்த்துள்ளனர். அப்போது அழுகிய நிலையில் அமுதா சடலமாக கிடந்ததை கண்டு அதிர்ச்சி அடைந்தனர்.
பின்னர் அமுதாவின் உடல் திருவள்ளுவர் அரசு மருத்துவமனைக்கு பிரேத பரிசோதனைக்காக அனுப்பி வைக்கப்பட்டது. இதுகுறித்து வழக்கு பதிவு செய்த போலீசார் நடத்திய விசாரணையில் ஏற்கனவே 2 முறை அமுதா தனது கணவர் மற்றும் குழந்தைகளை தவிக்க விட்டு ஜோதீஸ்வரனுடன் சென்றுள்ளார். அவர் இருக்கும் இடத்தை அறிந்து பாபு அங்கு சென்று தனது மனைவியை சமாதானப்படுத்தி வீட்டிற்கு அழைத்து வந்துள்ளார்.
தற்போது 3-வது முறையாக அமுதா ஜோதீஸ்வரனுடன் சென்ற பிறகு பாபு தனது மனைவி இருக்கும் இடத்தை அறிந்து அங்கு சென்றுள்ளார். அப்போது ஜோதீஸ்வரன் தன்னை ஏமாற்றி விட்டதாக அமுதா தெரிவித்துள்ளார். மேலும் தற்போது வீட்டிற்கு வர விருப்பமில்லை எனவும் கூறியுள்ளார். இதனால் அமுதாவின் இறப்பில் மர்மம் இருப்பதாக பாபு காவல் நிலையத்தில் புகார் அளித்துள்ளார். இதனால் ஜோதிஸ்வரன் மற்றும் அவருக்கு உடந்தையாக இருந்த சிவப்பிரகாசம் ஆகிய இரண்டு பேரையும் போலீசார் தீவிரமாக தேடி வருகின்றனர்.