சாம்சங், சியோமி மற்றும் மோட்டோரோலா போன்ற நிறுவனங்கள் சந்தையில் போட்டியை ஏற்படுத்தும் வகையில் தொடர்ச்சியாக போல்டபில் ஸ்மார்ட்போன்களை வெளியிட்டு வருகின்றன. இந்நிலையில் கூகுள் நிறுவனமும் தனது பிக்சல் போல்டு மாடலை அறிமுகம் செய்ய இருப்பதாக தெரிவித்துள்ளது. மேலும் oppo நிறுவனம் இரண்டு மடிக்கக்கூடிய ஸ்மார்ட்போன் மாடல்களை அறிமுகம் செய்யும் வேலையில் ஈடுபட்டு வருவதாக தகவல்கள் வெளியாகியுள்ளது. தற்போது ஒன்பிளஸ்-இன் புது மடிக்கக்கூடிய ஸ்மார்ட்போன் டீசர்கள் வெளியாகியுள்ளன.
கடந்த’ 2019 ஆண்டிலேயே ஹூவாய், சாம்சங் மற்றும் மோட்டோரோலா போன்ற நிறுவனங்கள் மடிக்கக்கூடிய ஸ்மார்ட்போன்களை அறிமுகம் செய்து சந்தையில் புது துவக்கத்திற்கு அடித்தளம் போட்டது. ஆனால் 2020-ஆம் ஆண்டு மடிக்கக்கூடிய ஸ்மார்ட்போன்கள் அதிக வரவேற்பை பெறவில்லை. எனவே இது போன்ற மாடலை அறிமுகம் செய்யும் திட்டம் இல்லை என ஒன்பிளஸ் தலைமை செயல் அதிகாரி பீட் லௌ தெரிவித்திருந்தார். இந்நிலையில் ஒன்பிளஸ் சிஇஒ பீட் லௌ தனது ட்விட்டரில் “இது என்னவாக இருக்கும் என நினைக்கின்றீர்கள்” எனும் கேள்வியுடன் போல்டபில் ஸ்மார்ட்போன் ஹின்ஜ் புகைப்படத்தை பகிர்ந்துள்ளார். இது தோற்றத்தில் ஒப்போ பைண்ட் N மாடலின் ஹின்ஜ் போன்று உள்ளது.