ஜி.வி.பிரகாஷ்க்கு ஜோடியாக “பேச்சிலர்” திரைப்படத்தில் நடித்து பிரபலமானவர் திவ்யா பாரதி. மேலும் மதில்மேல் காதல், ஆசை போன்ற படங்களிலும் நடித்து உள்ளார். அதுமட்டுமின்றி வெப் தொடர்களிலும் நடிக்கிறார். இதற்கிடையில் திவ்யா பாரதியை சமூகவலைத்தளங்களில் பலர் கிண்டல் செய்து வந்தனர். தற்போது இதற்கு அவர் பதிலடி கொடுத்து இருக்கிறார். இது தொடர்பாக திவ்யா பாரதி இன்ஸ்டாகிராம் பக்கத்தில் வெளியிட்டுள்ள பதிவில் “அண்மை காலமாக நான் உருவக் கேலிகளை எதிர்கொண்டு வருகிறேன்.
அதாவது, என் உடல் தோற்றம் போலியானது. என் இடுப்பு பகுதியில் பேடுகள் வைத்துள்ளேன். என் இடுப்புக்கு அறுவை சிகிச்சை செய்து இருக்கிறேன் என சிலர் கேலி செய்து பேசுகின்றனர். மேலும் நான் எலும்பு கூடுபோல் உள்ளதாகவும் கருத்து தெரிவிக்கின்றனர். கல்லூரி நாட்களிலும் பல பேர் என்னை உருவக்கேலி செய்து உள்ளனர். இவையெல்லாம் என்னை மிகவும் பாதித்து, என் உடலை வெறுக்கும்படியும் செய்தது. அத்துடன் மக்கள் முன்னால் செல்ல பயமாக இருந்தது.
மாடலிங்கில் நுழைந்து என் திரைப்படங்களை சமூகவலைத்தளத்தில் வெளியிட ஆரம்பித்ததும் அதனை பார்த்து என் உடல் அமைப்பை பாராட்டினர். அதன்பின் இது எனக்கு ஒரு தைரியத்தை கொடுத்தது. ரசிப்பவர்களும், வெறுப்பவர்களும் எப்போதுமே இருக்கின்றனர். விமர்சனங்களை கண்டுகொள்ளாதவரை நாம் வலிமையாகவும், அன்பாகவும் இருக்கலாம்” என்று குறிப்பிட்டுள்ளார்.